വിദ്യാനികേതൻ വയനാട് ജില്ലാ കലോത്സവം സമാപിച്ചു

Newsdesk Wayanadvaartha — Mon, 19 Oct 2026 14:59:21 +0000

മാനന്തവാടി: ഒക്ടോബർ 16, 17 തീയ്യതികളിലായി തോണിച്ചാൽ വീരപഴശ്ശി വിദ്യാമന്ദിരത്തിൽ നടന്ന ഭാരതീയ വിദ്യാനികേതൻ വയനാട് ജില്ലാ കലോത്സവം ‘കൽഹാരം’ സമാപിച്ചു. സമാപന സമ്മേളനം ജില്ലാ സംയോജക് നവജീവൻ പി.വി ഉദ്ഘാടനം ചെയ്‌തു.

പ്രദീപ് പാലക്കൽ സ്വാഗതം പറഞ്ഞു. ജില്ലാ ഉപാധ്യക്ഷൻ വി.കെ ജനാർദ്ധനൻ അധ്യക്ഷത വഹിച്ചു. കലോത്സവത്തിൽ തോണിച്ചാൽ വീരപഴശ്ശി വിദ്യാമന്ദിരം ഇംഗ്ലീഷ് മീഡിയം സ്കൂൾ ഒന്നാം സ്ഥാനവും കണിയാമ്പറ്റ നിവേദിത വിദ്യാനികേതൻ രണ്ടാം സ്ഥാനവും കൽപ്പറ്റ ശ്രീ ശങ്കര വിദ്യാമന്ദിരം മൂന്നാം സ്ഥാനവും

സ്പാകളുടെ മറവിൽ ലൈംഗിക ചൂഷണം; സംസ്ഥാനത്ത് ‘ഓപ്പറേഷൻ സ്പാ’ പരിശോധനകൾ ശക്തമാക്കും: മന്ത്രി രമേശ് ചെന്നിത്തല

Newsdesk Wayanadvaartha — Mon, 19 Oct 2026 12:44:37 +0000

തൃശ്ശൂർ : സംസ്ഥാനത്ത് ആയുർവേദ–ബ്യൂട്ടി പാർലറുകളുടെയും സ്പാകളുടെയും മറവിൽ ലൈംഗിക ചൂഷണങ്ങളും അനാശാസ്യ പ്രവർത്തനങ്ങളും വർദ്ധിക്കുന്ന സാഹചര്യത്തിൽ കർശന നടപടികളുമായി സർക്കാർ . ഇതിന്റെ ഭാഗമായി ‘ഓപ്പറേഷൻ സ്പാ’ എന്ന പേരിൽ സംസ്ഥാനവ്യാപകമായി ശക്തമായ പോലീസ് പരിശോധന നടത്തുമെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കി. നിയമവിരുദ്ധമായി പ്രവർത്തിക്കുന്ന സ്ഥാപനങ്ങൾ പൂട്ടിക്കുന്നതിനൊപ്പം ഇവ കേന്ദ്രീകരിച്ച് നടക്കുന്ന മനുഷ്യക്കടത്തും ചൂഷണങ്ങളും തടയുകയാണ് പരിശോധനയുടെ ലക്ഷ്യം.

യാതൊരുവിധ മാനദണ്ഡങ്ങളും പാലിക്കാതെ കേവലം ഷോപ്പ്സ് ആൻഡ് എസ്റ്റാബ്ലിഷ്‌മെന്റ് ആക്ടിന്റെ മാത്രം മറപിടിച്ചാണ് സംസ്ഥാനത്തുടനീളം ഇത്തരം കേന്ദ്രങ്ങൾ കൂണുപോലെ മുളച്ചുപൊന്തുന്നതെന്ന് മന്ത്രി കുറ്റപ്പെടുത്തി. ആരാണ് ഇത്തരം സ്ഥാപനങ്ങൾ നടത്തുന്നതെന്നോ അവിടെ എന്താണ് നടക്കുന്നതെന്നോ കൃത്യമായ വിവരങ്ങളില്ല. ഇതര സംസ്ഥാനങ്ങളിൽ നിന്നുള്ളവരടക്കമുള്ള പെൺകുട്ടികളെ പ്രലോഭിപ്പിച്ച് കൊണ്ടുവന്ന് ഇത്തരം കേന്ദ്രങ്ങളിൽ ചൂഷണം ചെയ്യുന്നത് ഒരു കാരണവശാലും അംഗീകരിക്കാനാകില്ലെന്നും അദ്ദേഹം പറഞ്ഞു.

അനധികൃതമായി പ്രവർത്തിക്കുന്ന എല്ലാ കേന്ദ്രങ്ങൾക്കുമെതിരെ വിട്ടുവീഴ്ചയില്ലാത്ത നിയമനടപടി സ്വീകരിക്കും. സ്പാകൾക്ക് നിയന്ത്രണം ഏർപ്പെടുത്തുന്നതിനായി കർശന വ്യവസ്ഥകളോടെ പുതിയ നിയമനിർമ്മാണം കൊണ്ടുവരാൻ സർക്കാർ ആലോചിക്കുന്നുണ്ട്. നിലവിൽ നിരവധി കേന്ദ്രങ്ങൾക്കെതിരെ പോലീസ് കേസെടുത്തിട്ടുണ്ടെന്നും വരും ദിവസങ്ങളിൽ വയനാട് ഉൾപ്പെടെയുള്ള വിനോദസഞ്ചാര മേഖലകളിലും നഗരങ്ങളിലും റെയ്ഡുകൾ കൂടുതൽ ശക്തമാക്കുമെന്നും മന്ത്രി പറഞ്ഞു.

കുട്ടികളുടെ ലൈംഗിക വിദ്യാഭ്യാസവും ഡിജിറ്റൽ സുരക്ഷയും പാഠ്യപദ്ധതിയാക്കാൻ സുപ്രീം കോടതി നിർദ്ദേശം

Newsdesk Wayanadvaartha — Mon, 19 Oct 2026 08:06:28 +0000

ന്യൂഡൽഹി: കുട്ടികളുടെ ലൈംഗിക വിദ്യാഭ്യാസവും ഡിജിറ്റൽ സുരക്ഷയും സ്കൂൾ പാഠ്യപദ്ധതിയുടെ ഭാഗമാക്കണമെന്ന നിർണ്ണായക ഉത്തരവുമായി സുപ്രീംകോടതി. സ്വന്തം ശരീരത്തെക്കുറിച്ചുള്ള ധാരണ, ബോഡി അവെയർനസ്, നല്ലതും മോശവുമായ സ്പർശനങ്ങൾ (ഗുഡ് ടച്ച് & ബാഡ് ടച്ച്) തിരിച്ചറിയാനുള്ള കഴിവ്, സമ്മതം (സമ്മതപൂർവ്വമുള്ള പെരുമാറ്റം) എന്നിവ പ്രാഥമിക വിദ്യാഭ്യാസ ഘട്ടം മുതൽ കുട്ടികളെ പഠിപ്പിക്കണമെന്ന് കോടതി ഉത്തരവിട്ടു.

ജസ്റ്റിസ് ജെ.ബി. പർദിവാല, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് രാജ്യത്തെ സ്കൂളുകൾക്കും കേന്ദ്ര-സംസ്ഥാന സർക്കാരുകൾക്കും സുപ്രധാന നിർദ്ദേശങ്ങൾ നൽകിയത്.

നമ്പർ പ്ലേറ്റിൽ ചിത്രപ്പണികൾ വേണ്ട, 5000 രൂപ വരെ പിഴ; മുന്നറിയിപ്പുമായി MVD

Newsdesk Wayanadvaartha — Mon, 19 Oct 2026 07:47:26 +0000

തിരുവനന്തപുരം : വാഹനങ്ങളുടെ നമ്പർ പ്ലേറ്റുകളിൽ ക്രമക്കേടുകൾ കാട്ടിയാൽ പിഴയീടാക്കുമെന്ന മുന്നറിയിപ്പുമായി മോട്ടോർ വാഹന വകുപ്പ്. രജിസ്ട്രേഷൻ നമ്പർ എന്നത് വാഹനങ്ങളെ സംബന്ധിച്ചിടത്തോളം ഏറെ പ്രധാനപ്പെട്ട ഒന്നാണ്. എന്നാൽ പല വാഹന ഉടമകളും വളരെ ലാഘവത്തോടെ അവർക്കിഷ്ടപ്പെട്ട രീതിയിൽ നമ്പർ പ്ലേറ്റ് പ്രദർശിപ്പിക്കുകയും, ചിലർ മറച്ച് വെക്കുകയും, മറ്റു ചിലർ അഴിച്ചു വെക്കുകയും, കാണാതിരിക്കാൻ ചെളി വാരിത്തേക്കുകയും ഒക്കെ ചെയ്യുന്നതായി കാണുന്നുവെന്ന് എംവിഡി സമൂഹമാധ്യമ പോസ്റ്റിൽ പറഞ്ഞു.

ഇത്തരം പ്രവൃത്തികൾ കൊണ്ട് അപകടങ്ങളിൽ പെട്ട വാഹനങ്ങൾ തിരിച്ചറിയാൻ പ്രയാസമുണ്ടാവുകയും, ഹിറ്റ് ആൻഡ് റൺ കേസുകളിൽ ഇരകൾക്ക് കിട്ടേണ്ട ഇൻഷുറൻസ് പരിരക്ഷ കിട്ടാതിരിക്കാനും സാധ്യതയുണ്ടെന്നും എംവിഡി ചൂണ്ടിക്കാട്ടി. ഇത്തരം നിയമലംഘനങ്ങൾക്ക് രജിസ്ട്രേഷൻ ചട്ടങ്ങളുടെ ലംഘനമായി കണക്കാക്കി ലൈറ്റ് മോട്ടോർ വാഹനങ്ങൾക്ക് 3000 രൂപയും, മീഡിയം/ഹെവി വാഹനങ്ങൾക്ക് 5000 രൂപയുമാണ് പിഴ.

എംവിഡി ചൂണ്ടിക്കാട്ടുന്ന 14 നിയമലംഘനങ്ങൾ:

1. നമ്പർ പ്ലേറ്റ് അഴിച്ചു വെക്കുക.

2. നമ്പർ പ്ലേറ്റ് വളച്ച് വെക്കുക.

3. നമ്പർ കാണാത്ത തരത്തിൽ മറച്ചുവെക്കുക.

4. നമ്പർ പ്ലേറ്റിന്റെ ഒരു ഭാഗം മുറിച്ചു കളയുക.

5. കാണാതിരിക്കാൻ കരി ഓയിൽ, ചെളി മുതലായവ തേച്ചു വെക്കുക.

6. ഏതെങ്കിലും ഒരു അക്കത്തിനു മേൽ എന്തെങ്കിലും ഒട്ടിച്ചു വെക്കുക.

7. നമ്പർ പ്ലേറ്റ് തന്നെ വിചാഗിരി വെച്ച് ആവശ്യത്തിന് മടക്കി വെക്കുക.

8. ആവശ്യാനുസരണം റിമോട്ട് വഴി പ്ലേറ്റിനെ കവർ ചെയ്യുക.

9. ക്യാമറയിൽ പതിയാത്ത തരം മെറ്റീരിയൽ കൊണ്ട് നമ്പർ പ്ലേറ്റ് ഉണ്ടാക്കുക.

10. നമ്പർ പ്ലേറ്റിൽ അനാവശ്യമായ ചിത്രങ്ങൾ, എഴുത്തുകൾ ഒട്ടിക്കുക.

11. ടെമ്പററി രജിസ്ട്രേഷൻ നമ്പർ മഞ്ഞ പ്രതലത്തിൽ ചുവപ്പ് അക്കങ്ങൾക്ക് പകരം ചുവന്ന പ്രതലത്തിൽ വെളുത്തതോ, കറുത്തതോ നിറമുള്ള അക്കത്തിൽ എഴുതുക.

12. ട്രാൻസ്പോർട്ട് വാഹനങ്ങളിൽ സൈഡിൽ നമ്പർ എഴുതാതിരിക്കുക.

13. ബാറ്ററി ഓപ്പറേറ്റഡ് ട്രാൻസ്പോർട്ട് വാഹനങ്ങൾക്ക് പച്ച പ്രതലത്തിൽ മഞ്ഞ അക്ഷരത്തിനു പകരം വെളുത്ത അക്ഷരത്തിൽ എഴുതുക.

14. ഹൈ സെക്യൂരിറ്റി നമ്പർ പ്ലേറ്റ് അഴിച്ചുമാറ്റി സാധാരണ നമ്പർ പ്ലേറ്റ് ഘടിപ്പിക്കുക.

പൊല്യൂഷൻ ടെസ്റ്റ് ഇനി വെറും പുകപരിശോധന മാത്രമല്ല, ബ്രേക്കും ടയറുംവരെ പരിശോധിക്കും

Newsdesk Wayanadvaartha — Mon, 19 Oct 2026 07:34:14 +0000

വാഹനങ്ങളുടെ മലിനീകരണ പരിശോധനയില്‍ (പൊല്യൂഷൻ ടെസ്റ്റ്) വിലയിരുത്തുക പുക മാത്രമല്ല. വാഹനത്തിന്റെ ബ്രേക്കുകള്‍, ടയർ എന്നിവയടക്കം ഉണ്ടാക്കുന്ന മലിനീകരണവും വിലയിരുത്തപ്പെടും. പേരിനുവേണ്ടിയുള്ള വിലയിരുത്തല്‍ മാത്രമാകില്ല; എല്ലാം കർശനമായി പരിശോധിച്ചായിരിക്കും പൊല്യൂഷൻ സർട്ടിഫിക്കറ്റ് തരിക. ബിഎസ്-VII മലിനീകരണ നിയന്ത്രണങ്ങള്‍ രാജ്യത്ത് നടപ്പിലാക്കുന്നതിന്റെ ഭാഗമായാണ് പരിശോധന അടിമുടി മാറുന്നത്. രാജ്യത്തെ മലിനീകരണ നിയന്ത്രണ മാനദണ്ഡങ്ങളില്‍ ഏറ്റവും വലിയ വിപുലീകരണത്തിനാണ് കേന്ദ്രം ഒരുങ്ങുന്നതെന്നാണ് റിപ്പോർട്ട്.

2029 ഏപ്രില്‍ മുതല്‍ ബിഎസ്-VII മാനദണ്ഡങ്ങള്‍ ഘട്ടംഘട്ടമായി നടപ്പിലാക്കാൻ നിർദ്ദേശിച്ചുകൊണ്ട് റോഡ് ഗതാഗത ഹൈവേ മന്ത്രാലയം പുറത്തിറക്കിയ കരട് ഗസറ്റ് വിജ്ഞാപനത്തിലാണ് ഇക്കാര്യങ്ങള്‍ വ്യക്തമാക്കുന്നത്. പുക പുറന്തള്ളാത്ത ഇലക്‌ട്രിക് വാഹനങ്ങളുടെ ബ്രേക്കിംഗിലൂടെ ഉണ്ടാക്കുന്ന മലിനീകരണം, ടയർ തേയ്‌മാനം, ബാറ്ററിയുടെ ഈടുനില്‍പ്പ് എന്നിവയും പുതിയ പരിശോധനയില്‍ വിലയിരുത്തപ്പെടും. യൂറോപ്പിലെ യൂറോ 7 ചട്ടക്കൂടുമായി വലിയ സാമ്യമുള്ളവയാണ് ബിഎസ്-VII മാനദണ്ഡങ്ങള്‍

ഇലക്‌ട്രിക് വാഹനങ്ങളുടെയും പ്ലഗ്‌ഇൻ ഹൈബ്രിഡുകളുടെയും ബാറ്ററിയുടെ ഈടുനില്‍പ്പ് പുതിയ മാനദണ്ഡങ്ങള്‍ പ്രകാരം വിലയിരുത്തപ്പെടും. അഞ്ചുവർഷം അല്ലെങ്കില്‍ ഒരുലക്ഷം കിലോമീറ്റർ വരെ ബാറ്ററികള്‍ അവയുടെ യഥാർത്ഥ ശേഷിയുടെ കുറഞ്ഞത് 75 ശതമാനവും, 8 വർഷം അല്ലെങ്കില്‍ 1.6 ലക്ഷം കിലോമീറ്റർ വരെ 67 ശതമാനവും നിലനിർത്തണമെന്നാണ് പുതിയ വ്യവസ്ഥകള്‍ നിഷ്കർഷിക്കുന്നത്.

ടയർ തേയ്മാനത്തിലൂടെ ഉണ്ടാകുന്ന മലിനീകരണവും കർശനമായി വിലയിരുത്തുന്നതിനൊപ്പം അത് നിയന്ത്രിക്കാനുള്ള വ്യവസ്ഥകളും പുതിയ മാനദണ്ഡങ്ങളില്‍ ഉള്‍പ്പെടുന്നുണ്ട്. കാനഡ, യു.എസ്, ഓസ്ട്രേലിയ, ന്യൂസിലാൻഡ് തുടങ്ങിയ രാജ്യങ്ങള്‍ ഇതിനകം തന്നെ ടയർ ലെവി സിസ്റ്റം നടപ്പിലാക്കുന്നുണ്ട്. പുതിയ ടയർ വില്‍പ്പനയില്‍ ഈടാക്കുന്ന ഈ തുക ഉപയോഗിച്ച ടയറുകളുടെ പുനരുപയോഗത്തിനും പരിസ്ഥിതിക്ക് ഹാനികരമല്ലാത്ത സംസ്‌കരണത്തിനും ധനസഹായം നല്‍കാൻ ഉപയോഗിക്കും.

പുതിയ മാനദണ്ഡങ്ങള്‍ വരുന്നതോടെ പരിശോധന ശക്തമാകും. മാത്രമല്ല വാഹനം ഉപയോഗിക്കുന്ന കാലത്തുടനീളം മലിനീകരണ നിയന്ത്രണ സംവിധാനങ്ങള്‍ മികച്ച രീതിയില്‍ പ്രവർത്തിക്കുന്നുണ്ടെന്ന് ഉറപ്പാക്കാനുളള സംവിധാനങ്ങളും നിലവില്‍ വരും. നൂറുശതമായ കൃത്രിമം തടയുന്നതാകും ഇത്തരം പരിശോധനകള്‍.

പ്രവാസി ചീരാൽ മണ്ഡലം കൺവെൻഷൻ നടത്തി

Newsdesk Wayanadvaartha — Mon, 19 Oct 2026 07:20:37 +0000

സുൽത്താൻ ബത്തേരി : പ്രവാസി ചീരാൽ മണ്ഡലം കൺവെൻഷൻ ചീരാൽ ഭവനിൽ നടത്തി.പ്രവാസികൾ ചീരാൽ മണ്ഡലം പ്രസിഡൻ്റ് കെ. സി. കെ.തങ്ങൾ അധ്യക്ഷത വഹിച്ച ചടങ്ങിൽ ഡി. സി. സി.ജന :സെക്രട്ടറി കെ. ആർ.സാജൻ ഉദ്ഘാടനം ചെയ്തു.

ബ്ലോക്ക് പ്രസിഡൻ്റ് അബ്ദുൾ റഷീദ് നോർക്കയെ കുറിച്ച് ക്ഷേമ നിധിയെക്കുറിച്ചും വിശദമായി സംസാരിച്ചു.പ്രവാസി ജില്ലാ ജന :സെക്രട്ടറി ടി. ടി. സുലൈമാൻ മുഖ്യപ്രഭാഷണം നടത്തി.മണ്ഡലം പ്രസിഡൻ്റ് ആയി തിരഞ്ഞെടുത്ത കെ. സി. കെ. തങ്ങളെ യും മണ്ഡലം സെക്രട്ടറി ആയി തിരഞ്ഞെടുത്ത സജി പഴൂരിനെയും ചടങ്ങിൽ ആദരിച്ചു. ഐ. എൻ. സി. മണ്ഡലം പ്രസിഡൻ്റ് ഷിജു കൊഴുവണ,ഹാരിസ് സി. കെ, കരീം മുരിങ്ങ തൊടി, കെ മുനീബ്, പി. സദാനന്ദൻ എന്നിവർ ആശംസകൾ നേർന്നു സംസാരിച്ചു.

ചൂരൽമല – മുണ്ടക്കൈ ദുരന്തബാധിതർക്ക് മലങ്കര ഓർത്തഡോക്സ് സഭയുടെ വീടുകൾ: ആദ്യഘട്ട ശിലാസ്ഥാപനം നിർവഹിച്ചു

Newsdesk Wayanadvaartha — Mon, 19 Oct 2026 06:53:57 +0000

വാഴവറ്റ: ചൂരൽമല – മുണ്ടക്കെ ഉരുൾപൊട്ടൽ ദുരന്തബാധിതർക്കായി സ്വന്തമായി ഭൂമി വാങ്ങി വീടുകൾ നിർമ്മിച്ച് നൽകുന്ന മലങ്കര ഓർത്തഡോക്‌സ് സുറിയാനി സഭയുടെ പുനരധിവാസ പദ്ധതിക്ക് തുടക്കമായി. ആകെ വിഭാവനം ചെയ്ത‌ിട്ടുള്ള 50 വീടുകളിൽ ആദ്യഘട്ടത്തിലെ 13 ഭവനങ്ങളുടെ ശിലാസ്ഥാപനം സഭാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ നിർവ്വഹിച്ചു.

ഇതിനോടനുബന്ധിച്ച് നടന്ന പൊതുസമ്മേളനം ബഹു. കൃഷി വകുപ്പ് മന്ത്രി ശ്രീ. ടി. സിദ്ദിഖ് ഉദ്ഘാടനം ചെയ്‌തു. മെത്രാപ്പോലീത്തമാരായ ഡോ. ഏബ്രഹാം മാർ സെറാഫിം, ഡോ. ഗീവർഗീസ് മാർ ബർന്നബാസ്, സഭാ വൈദിക ട്രസ്റ്റി ഫാ. ഡോ. തോമസ് വർഗീസ് അമയിൽ, അൽമായ ട്രസ്റ്റി റോണി വർഗീസ് ഏബ്രഹാം, അസോസിയേഷൻ സെക്രട്ടറി അഡ്വ. ബിജു ഉമ്മൻ, സുൽത്താൻ ബത്തേരി ഭദ്രാസന സെക്രട്ടറി ഫാ. ബേബി ജോൺ, മേപ്പാടി പഞ്ചായത്ത് പ്രസിഡൻ് റംല ഹംസ, മറ്റ് തദ്ദേശ സ്വയംഭരണ ജനപ്രതിനിധികൾ, വൈദികർ, ഗുണഭോക്താക്കൾ തുടങ്ങിയവർ പങ്കെടുത്തു.

പുനരധിവാസ പദ്ധതിയുടെ രണ്ടാം ഘട്ടമായി വയനാട്ടിൽ ഒരു റിഹാബിലിറ്റേഷൻ സെന്റർ സ്ഥാപിക്കുമെന്നും, പ്രകൃതിദുരന്ത സാദ്ധ്യതയുള്ള മേഖലകളിൽ കഴിയുന്നവർക്ക് മഴക്കാലത്ത് ഇവിടെ സൗജന്യ താമസസൗകര്യം ഒരുക്കുമെന്നും സഭാ അധികൃതർ അറിയിച്ചു.

ശ്രീ വള്ളിയൂർക്കാവ് ഭഗവതി ക്ഷേത്രത്തിൽ നവരാത്രി ആഘോഷങ്ങൾക്ക് ഭക്തിസാന്ദ്രമായ തുടക്കമായി

Newsdesk Wayanadvaartha — Mon, 19 Oct 2026 06:45:12 +0000

മാനന്തവാടി : ഉത്തര മലബാറിലെ പ്രശസ്ത തീർത്ഥാടന കേന്ദ്രമായ ശ്രീ വള്ളിയൂർക്കാവ് ഭഗവതി ക്ഷേത്രത്തിൽ നവരാത്രി ആഘോഷങ്ങളുടെ ഭാഗമായുള്ള നൃത്ത-സംഗീത പരിപാടികൾക്ക് തുടക്കമായി . ക്ഷേത്ര പാരമ്പര്യ ട്രസ്റ്റി ഏച്ചോം ഗോപി കലാപരിപാടികളുടെ ഔദ്യോഗിക ഉദ്ഘാടനം നിർവഹിച്ചു. ഒക്ടോബർ 19, 20 തീയതികളിലായി പ്രമുഖ കലാകാരന്മാർ അണിനിരക്കുന്ന വൈവിധ്യമാർന്ന നൃത്ത-സംഗീതാർച്ചനകളാണ് ക്ഷേത്രസന്നിധിയിൽ അരങ്ങേറുന്നത്.

നവരാത്രി മഹോത്സവത്തിന്റെ ഭാഗമായി ഒക്ടോബർ 20 ചൊവ്വാഴ്ച മഹാനവമി ദിനത്തിൽ ആയുധപൂജയും വാഹനപൂജയും നടക്കും. ഒക്ടോബർ 21 ബുധനാഴ്ച വിജയദശമി നാളിൽ കുരുന്നുകളെ അക്ഷരലോകത്തേക്ക് ആനയിക്കുന്ന വിദ്യാരംഭ ചടങ്ങുകൾ, പ്രത്യേക വാഹനപൂജ, ഉച്ചയ്ക്ക് മഹാ അന്നദാനം എന്നിവയും ഒരുക്കിയിട്ടുണ്ട്. ഉത്സവ ദിനങ്ങളിൽ ക്ഷേത്ര മാതൃസമിതിയുടെ നേതൃത്വത്തിൽ ദിവസേന രാവിലെ ഭക്തിനിർഭരമായ ശ്രീ ലളിതാ സഹസ്രനാമാർച്ചനയും നടന്നു വരുന്നുണ്ട്.

കൂടാതെ, വള്ളിയൂർക്കാവ് ക്ഷേത്രത്തിലെ ഈ വർഷത്തെ ഐതിഹ്യപ്രസിദ്ധമായ ‘പുത്തരി ഉത്സവം’ ഒക്ടോബർ 28 ബുധനാഴ്ച വിപുലമായ ആചാര ചടങ്ങുകളോടെ പൂർവ്വാധികം ഭംഗിയായി ആഘോഷിക്കുമെന്ന് ക്ഷേത്ര ഭാരവാഹികൾ അറിയിച്ചു നവരാത്രി ആഘോഷങ്ങളിലും പൂജകളിലും പങ്കുചേരാൻ ജില്ലയുടെ വിവിധ ഭാഗങ്ങളിൽ നിന്നും ഇതര ജില്ലകളിൽ നിന്നും വൻ ഭക്തജനത്തിരക്കാണ് ക്ഷേത്രത്തിലേക്ക് അനുഭവപ്പെടുന്നത്

കോഴിക്കോട് നഗരത്തിലെ സ്പാകളിൽ വ്യാപക മിന്നൽ പരിശോധന; 20 മസാജ് സെന്ററുകൾ പൂട്ടിച്ച് പോലീസ്, 4 പേർ പിടിയിൽ

Newsdesk Wayanadvaartha — Mon, 19 Oct 2026 06:33:25 +0000

കോഴിക്കോട്: നഗരത്തിൽ പ്രവർത്തിക്കുന്ന സ്പാകളിലും മസാജ് സെന്ററുകളിലും അനാശാസ്യം ഉൾപ്പെടെയുള്ള നിയമവിരുദ്ധ പ്രവർത്തനങ്ങൾ നടക്കുന്നെന്ന പരാതികളെത്തുടർന്ന് സിറ്റി പോലീസിന്റെ വ്യാപക മിന്നൽ പരിശോധന . എഴുപതോളം കേന്ദ്രങ്ങളിൽ ഒരേസമയം നടത്തിയ റെയ്ഡിൽ മതിയായ രേഖകളും ലൈസൻസുകളുമില്ലാതെ പ്രവർത്തിച്ച 20 മസാജ് സെന്ററുകൾ പോലീസ് നേരിട്ടെത്തി അടപ്പിച്ചു. ആറ് സ്ഥാപനങ്ങൾക്ക് പ്രവർത്തനം നിർത്തിവെക്കാൻ അടിയന്തര നോട്ടീസ് നൽകി.

പരിശോധനയുടെ ഭാഗമായി എലത്തൂർ, കസബ, ടൗൺ, നടക്കാവ് എന്നീ പോലീസ് സ്റ്റേഷനുകളിൽ പ്രത്യേക കേസുകൾ രജിസ്റ്റർ ചെയ്യുകയും നാല് പേരെ അറസ്റ്റ് ചെയ്യുകയും ചെയ്തു. സ്ഥാപനങ്ങൾക്ക് ആവശ്യമായ തദ്ദേശ സ്ഥാപനങ്ങളുടെ ലൈസൻസുകൾ, ആരോഗ്യവകുപ്പിന്റെ അനുമതികൾ, ചികിത്സാ മാനദണ്ഡങ്ങൾ എന്നിവ കൃത്യമായി പാലിക്കുന്നുണ്ടോ എന്ന് ഉറപ്പുവരുത്താനായിരുന്നു പ്രത്യേക പരിശോധന.

ലൈസൻസുകളുടെയോ സ്ഥാപനങ്ങളുടെയോ മറവിൽ നിയമവിരുദ്ധ പ്രവർത്തനങ്ങൾ നടത്തുന്നവർക്കെതിരെ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്ന് കോഴിക്കോട് സിറ്റി പോലീസ് കമ്മീഷണർ രാജ്പാൽ മീണ ഐ.പി.എസ് അറിയിച്ചു. ഇത്തരം സ്ഥാപനങ്ങളിൽ മതിയായ രേഖകളോ സർട്ടിഫിക്കറ്റുകളോ ഇല്ലാതെ ജോലി ചെയ്യുന്ന തൊഴിലാളികൾക്കെതിരെയും, നിയമവിരുദ്ധ പ്രവർത്തനങ്ങൾക്കായി എത്തുന്ന സന്ദർശകർക്കെതിരെയും കർശനമായ നിയമനടപടികൾ ഉണ്ടാകും. അനാശാസ്യ പ്രവർത്തനങ്ങളുമായി ബന്ധപ്പെട്ട നിയമലംഘനങ്ങളിൽ കൃത്യമായ തെളിവുകളുടെ അടിസ്ഥാനത്തിൽ തുടർനടപടികൾ സ്വീകരിക്കുമെന്നും പരിശോധനകൾ വരും ദിവസങ്ങളിലും തുടരുമെന്നും പോലീസ് വ്യക്തമാക്കി

സംസ്ഥാനത്ത് സ്വർണ വില വർധിച്ചു; ഇന്ന് പവന് കൂടിയത് 280 രൂപ

Newsdesk Wayanadvaartha — Mon, 19 Oct 2026 06:07:50 +0000

സംസ്ഥാനത്ത് സ്വർണ വിലയിൽ നേരിയ വർധനവ്. ഇന്ന് 22 കാരറ്റ് സ്വർണത്തിന് ഗ്രാമിന് 35 രൂപയും പവന് 280 രൂപയുമാണ് കൂടിയിരിക്കുന്നത്. ഇതോടെ ഇന്ന് ഗ്രാമിന് 13,570 രൂപയും പവന് 1,08,560 രൂപയുമാണ് നിലവിൽ കേരളത്തിൽ വില.

അന്താരാഷ്ട്ര വിലയിലെ കയറ്റിറക്കങ്ങളാണ് കേരളത്തിലെയും സ്വർണ വിലയെ സ്വാധീനിക്കാറുള്ളത്. അതേ സമയം, സംസ്ഥാനത്ത് വെള്ളി വിലയിൽ മാറ്റമില്ലാതെ തുടരുന്ന നിലയാണ്. നിലവിൽ വെള്ളി ഗ്രാമിന് 30 രൂപയിലും 10 ഗ്രാമിന് 2,300 രൂപയും എന്ന കണക്കിലാണ് വ്യാപാരം നടക്കുന്നത്.

കഴിഞ്ഞ 10 ദിവസങ്ങളിലെ സ്വർണ നിരക്ക്

ഒക്ടോബർ 19- 1,08,560 രൂപ

ഒക്ടോബർ 18- 1,08,280 രൂപ

ഒക്ടോബർ 17- 1,08,280 രൂപ

ഒക്ടോബർ 16- 1,08,120 രൂപ

ഒക്ടോബർ 15- 1,08,120 രൂപ

ഒക്ടോബർ 14- 1,08,720 രൂപ

ഒക്ടോബർ 13- 1,09,480 രൂപ

ഒക്ടോബർ 12- രാവിലെ 1,10,720 രൂപ| വൈകീട്ട് 1,09,760 രൂപ

ഒക്ടോബർ 11- 1,11,040 രൂപ

ഒക്ടോബർ 10- 1,11,040 രൂപ

ഒക്ടോബ‍‌ർ 9- 1,10,520 രൂപ