കാട്ടിക്കുളം:കാട്ടിക്കുളത്ത് കവർച്ചക്കിടെ രണ്ട് യുവാക്കളെ സെക്യൂരിറ്റി ജീവനക്കാരന്റേയും, നാട്ടുകാരുടെയും സഹായത്തോടെ പോലീസ് പിടികൂടി. കാട്ടിക്കുളം ഹൈസ്‌കൂളിന് സമീപത്തെ പുതിയിടത്ത് പ്രദീപിന്റെ വെജ്ജ് മാർട്ടിൽ നിന്നാണ് ഇന്ന് രാവിലെ രണ്ടരയോടെ മോഷ്‌ടാക്കളെ പിടികൂടിയത്. കോഴിക്കോട് കാപ്പാട് സ്വദേശി കോയാസ് കോട്ടേജിൽ മുഹമ്മദ് മൺസൂർ (22), ബത്തേരി നായ്ക്കട്ടി സ്വദേശി ഇല്ലിക്കൽ വീട്ടിൽ കിഷോർ (19) എന്നിവരാണ് അറസ്റ്റിലായത്.
ഇന്ന് പുലർച്ചെ രണ്ടരയോടെ പൂട്ടിയിട്ട കടയുടെ അരികിലെ ഷീറ്റ് പൊളിച്ചാണ് മോഷ്ടാക്കൾ അകത്ത് കയറിയത്. അസമയത്ത് വെളിച്ചം ശ്രദ്ധയിൽപ്പെട്ട കാട്ടിക്കുളത്തെ സെക്യൂരിറ്റി ജീവനക്കാരൻ സന്തോഷ് പുളിക്കാംപറമ്പത്ത് ആണ് മോഷണം നടക്കുന്ന വിവരം ആദ്യം കണ്ടത്. തുടർന്ന് നാട്ടുകാരും പോലിസും ചേർന്ന് മോഷ്‌ടാക്കളെ പിടികൂടുകയായിരുന്നു.
സംഭവസ്ഥലത്ത് നിന്നും പ്രതികളുടെ മൊബൈലും ചെരുപ്പും കണ്ടെത്തി. വിരളടയാള വിദഗ്ദൻ ഡോ.സുഭാഷ്ഗോപി, ഫോട്ടോഗ്രാഫർ മിഥുൻ വിനോദ് എന്നിവർ സ്ഥലത്തെത്തി ശാസ്ത്രിയ പരിശോധന നടത്തി.പ്രതികളെ സംഭവ സ്ഥലത്തെത്തിച്ച് ഡിവൈഎസ്പിബിനു രാജിൻ്റെ നേതൃത്വത്തിൽ തെളിവെടുപ്പ് നടത്തി. തിരുനെല്ലി എസ് ഐ ദിജേഷ് എൻ, സജിമോൻ ജെയ്‌സൻ. ഒ.വി, അനുപ് ഇ എ. എന്നിവർ സംഘത്തിലുണ്ടായിരുന്നു.
