വയനാട് ജില്ലയിലെ ദുരിതാശ്വാസ ക്യാമ്പുകൾ സന്ദർശിച്ച് വനം-വന്യജീവി സംരക്ഷണ വകുപ്പ് മന്ത്രി എ.കെ ശശീന്ദ്രനും പട്ടികവർഗ്ഗ- പട്ടികജാതി പിന്നാക്കക്ഷേമ വകുപ്പ് മന്ത്രി ഒ.ആർ കേളുവും. കണിയാമ്പറ്റ ജി.യു.പി. സ്കൂൾ, കൈതക്കൽ ജി.എൽ.പി.സ്കൂൾ, പൂതാടി എസ്.എൻ എച്ച്.എസ്. സ്കൂളുകളിലെ ക്യാമ്പുകളാണ് മന്ത്രിമാർ സന്ദർശിച്ചത്. ക്യാമ്പുകളിൽ എത്തിയ മന്ത്രിമാർ ക്യാമ്പുകളിൽ കഴിയുന്നവരോട് സംസാരിക്കുകയും സൗകര്യങ്ങൾ ഉറപ്പാക്കുകയും ചെയ്‌തു. വകുപ്പുകൾ കൃത്യസമയങ്ങളിൽ ഇടപെടൽ നടത്തുന്നത് സംബന്ധിച്ചും ആരോഗ്യ പ്രവർത്തകരുടെ സേവനം ക്യാമ്പിൽ ലഭിക്കുന്നുണ്ടോയെന്ന് ക്യാമ്പുകളിലെ ആളുകളോട് ചോദിച്ചറിഞ്ഞു.
കണിയാമ്പറ്റ ജി.യു.പി. സ്കൂളിലെ ക്യാമ്പിൽ എത്തിയ മന്ത്രി എ.കെ ശശീന്ദ്രൻ ഭക്ഷണം കഴിച്ചാണ് മടങ്ങിയത്. വൈത്തിരി താലൂക്കിലെ കണിയാമ്പറ്റ ഗ്രാമപഞ്ചാത്തിലെ നാലാം വാർഡിൽ ഉൾപ്പെട്ട ചിറ്റൂർ, ചൊവ്വണ്ടേരി, ചീങ്ങാടി, കാവുവയൽ കോളനികളിലെ 48 പുരുഷമാരും 56 സ്ത്രീകളും 21 കുട്ടികളും 3 പ്രായമായവരും 1 ഗർഭിണിയും ഉൾപ്പെടെ 129 അംഗങ്ങളാണ് കണിയാമ്പറ്റ ജി.യു.പി.സ്കൂളിലെ ക്യാമ്പിലുള്ളത്. മാനന്തവാടി താലൂക്കിലെ കൈതക്കൽ ജി.യു.പി സ്കൂളിലെ ക്യാമ്പിൽ 30 കുടുംബങ്ങളിലെ 49 പുരുഷൻമാരും 47 സ്ത്രീകളും 27 കുട്ടികളും ഉൾപ്പടെ 123 അംഗങ്ങളാണ് കഴിയുന്നത്. സുൽത്താൻ ബത്തേരി താലൂക്കിലെ പൂതാടി എസ്.എൻ എച്ച്.എസ് സ്കൂകൂളുകളിലെ ക്യാമ്പിൽ 6 കോളനികളിലെ 37 കുടുംബങ്ങളിലെ 43 പുരുഷൻമാരും 50 സ്ത്രീകളും 41 കുട്ടികളും ഉൾപ്പടെ 134 അംഗങ്ങളുമാണുള്ളത. മൂന്ന് ക്യാമ്പുകളിലെയും പ്രവർത്തനങ്ങളും ആവശ്യമായ ക്രമീകരണങ്ങളും മന്ത്രിമാർ വിലയിരുത്തി. എ.ഡി.എം കെ. ദേവകി, അസിസ്റ്റൻ്റ് കളക്‌ടർ ഗൗതംരാജ്, ഹുസൂർ ശിരസ്ത‌ദാർ വി.കെ ഷാജി എന്നിവരും മന്ത്രിമാരുടെ ഒപ്പമുണ്ടായിരുന്നു.
