കമ്പളക്കാട്: മൂന്നു ലക്ഷത്തോളം വിലയുള്ള കാപ്പി മോഷ്ടിച്ച സംഭവത്തിൽ ഒരാളെ കൂടി കമ്പളക്കാട് പോലീസ് പിടികൂടി. മുട്ടിൽ, വാര്യാട് വടക്കൻ വീട്ടിൽ മുഹമ്മദ് മുഹമ്മദ് സുഹൈൽ(24)നെയാണ് അറസ്റ്റ് ചെയ്തത്. ഏപ്രിലിലാണ് സംഭവം.
കമ്പളക്കാട് ചേക്ക്മുക്ക സ്വദേശിയുടെ വീടിൻ്റെ പോർച്ചിലും മില്ലിലും സൂക്ഷിച്ച കാപ്പിയാണ് മോഷണം പോയത്. കാക്കവയൽ തേനേരി ബാലുശ്ശേരി വീട്ടിൽ മുഹമ്മദ് ഷാനിഫ് (22), കണിയാമ്പറ്റ വെല്ലൂർകാവിൽ വീട്ടിൽ അൻസിഫ് മുഹമ്മദ് (23) എന്നിവരെ പിടികൂടിയിരുന്നു. ഇവർ കാപ്പി മാന്തവാടിയിൽ മറിച്ചു വിൽക്കുകയായിരുന്നു. കമ്പളക്കാട് ഇൻസ്പെക്ടർ എം.എ. സന്തോഷിൻ്റെ നേതൃത്വത്തിൽ സബ് ഇൻസ്പെക്ടർ വി. ഷറദ്ദീൻ, ഇ.എസ്.ഐ വിജയൻ, എസ്.സി.പി.ഒ ജ്യോതിരാജ് എന്നിവർ പൊലീസ് സംഘത്തിലുണ്ടായിരുന്നു.
