കൊല്ലം: കൊല്ലം സ്വദേശിയായ യുവാവിനെയും ഭാര്യയെയും സൗദി അറേബ്യയിലെ റിയാദിൽ മരിച്ച നിലയിൽ കണ്ടെത്തി. കൊല്ലം തൃക്കരുവ നടുവിലച്ചേരി മംഗലത്തു വീട്ടിൽ അനൂപ് മോഹൻ, ഭാര്യ രമ്യമോൾ (28) എന്നിവരാണ് മരിച്ചത്. ദമ്പതിമാർക്കൊപ്പമുണ്ടായിരുന്ന അഞ്ചുവയസ്സുള്ള മകൾ ആരാധ്യ രക്ഷപ്പെട്ടതായും കുട്ടി നിലവിൽ ഇന്ത്യൻ എംബസിയിലാണെന്നും നാട്ടിലുള്ള ബന്ധുക്കൾക്ക് വിവരം ലഭിച്ചിട്ടുണ്ട്.
രണ്ടുദിവസം മുമ്പ് അനൂപ് ഭാര്യയെ കൊലപ്പെടുത്തിയതെന്നാണ് നിലവിൽ ലഭിച്ചവിവരം. അതിനുശേഷം അയാൾ മകൾക്കൊപ്പം താമസിച്ചുവരികയായിരുന്നു. എന്നാൽ, അമ്മയെ കൊലപ്പെടുത്തിയ വിവരം മകൾ അയൽവാസികളെ അറിയിച്ചതോടെ അനൂപും ജീവനൊടുക്കിയെന്നാണ് കരുതുന്നത്. വർഷങ്ങളായി റിയാദിൽ പെയിന്റിങ് വർക്ക്ഷോപ്പ് നടത്തിവരികയാണ് അനൂപ് മോഹൻ. അഞ്ചുമാസം മുമ്പാണ് ഭാര്യയെയും മകളെയും വിദേശത്തേക്ക് കൊണ്ടുപോയത്.
