കോഴിക്കോട് : ദേശീയപാതയിൽ പന്തീരാങ്കാവ് മെട്രോ ഹോസ്പിറ്റലിന് സമീപം കൂടത്തുംപാറയിൽ ഓടിക്കൊണ്ടിരുന്ന കാറിനു തീപിടിച്ചു കാർ പൂർണമായും കത്തിനശിച്ചു. ഇന്ന് വൈകുന്നേരം 5:20 ഓടെയാണ് സംഭവം.ഹൈലൈറ്റ് മാളിലേക്ക് മലപ്പുറം ഭാഗത്ത് നിന്നും വന്നവരുടെ കാറാണ് കത്തി നശിച്ചത്.
കാർ ഓടിക്കൊണ്ടിരിക്കെ ക്ലച്ചിന് തകരാർ സംഭവിക്കുകയും കാർ നിർത്തിയിട്ട് ബോണറ്റ് തുറന്നു പരിശോധിക്കുന്ന സമയത്ത് പെട്ടെന്ന് പുകയും തീയും ഉയരുകയായിരുന്നു. തുടർന്ന് കാറിൽ ഉണ്ടായിരുന്നവർ വെള്ളം ഒഴിച്ച് തീ അണക്കാൻ ശ്രമിച്ചെങ്കിലും നിമിഷം നേരം കൊണ്ട് തീ പൂർണ്ണമായും കാറിൽ പടർന്നു പിടിച്ചു. വിവരമറിഞ്ഞ് പന്തീരാങ്കാവ് പോലീസും മീഞ്ചന്ത ഫയർ യൂണിറ്റും സ്ഥലത്തെത്തി. ഏറെനേരത്തെ പരിശ്രമത്തിനൊടുവിൽ തീയണച്ചു. ദേശീയപാതയിൽ ഏറെനേരം ഗതാഗതം തടസപ്പെട്ടു.
