കോഴിക്കോട്: ഓടുന്ന ബസില്‍ നിന്ന് തെറിച്ച് വീണ് വയോധികന്‍ മരിച്ചു. കോഴിക്കോട് മാങ്കാവ് പാറമ്മല്‍ സ്വദേശി കൊച്ചാളത്ത് ഗോവിന്ദന്‍(59) ആണ് മരിച്ചത്. ചൊവ്വാഴ്ച വൈകിട്ടോടെയാണ് അപകടമുണ്ടായത്. കോഴിക്കോട് നഗരത്തില്‍ നിന്നും പന്തീരാങ്കാവിലേക്ക് പോകുന്ന സിറ്റി ബസില്‍ നിന്നാണ് ഗോവിന്ദന്‍ റോഡരികിലേക്ക് തെറിച്ചുവീണത്.
വളവിൽ ബസ് തിരിയുന്നതിനിടെ തുറന്നു കിടന്ന ഓട്ടോമാറ്റിക് ഡോറിലൂടെ അദ്ദേഹം റോഡിലേക്ക് തെറിച്ച് വീഴുകയായിരുന്നു. ഇടിയുടെ ആഘാതത്തിൽ ഫുട്ട്പാത്തിൽ തലയിടിച്ച് ഗുരുതരമായ പരിക്കേറ്റ ഇദ്ദേഹത്തെ ബീച്ച് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.പന്തീരങ്കാവിലേക്കുള്ള വിൻവേ എന്ന ബസിൽ നിന്നാണ് അദ്ദേഹം തെറിച്ചു വീണത്. മൃതദേഹം ബീച്ച് ആശുപത്രിയിലെ മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം ബുധനാഴ്ച്ച വൈകുന്നേരം മൂന്ന് മണിക്ക് മാങ്കാവ് ശ്‌മശാനത്തിൽ.
