തിരുവനന്തപുരം:തൃണമൂൽ കോൺഗ്രസിൽ ചേർന്നതിന് പിന്നാലെ പിവി അൻവർ എംഎൽഎ സ്ഥാനം രാജിവച്ചു. സ്പീക്കറെ നേരിൽ കണ്ടാണ് അദ്ദേഹം രാജിക്കത്ത് സമർപ്പിച്ചത്. രാജിക്കുറിപ്പിന് മുൻപ് അൻവറിന്റെ വാഹനത്തിൽ നിന്നുള്ള എംഎൽഎ ബോർഡും നീക്കം ചെയ്തിരുന്നു.
തൃണമൂൽ കോൺഗ്രസിൽ ഔദ്യോഗികമായി അംഗമാകാൻ സ്വതന്ത്ര എംഎൽഎ പദവി തടസമായതിനാലാണ് രാജി. നിയമസഭയുടെ കാലാവധി തീരുന്നതിന് മുൻപ് മറ്റൊരു പാർട്ടിയിൽ ചേർന്നാൽ അയോഗ്യത നേരിടേണ്ടി വരുമെന്നതിനാൽ ഇതിന് വഴിവെയ്ക്കുകയാണ് അൻവറിന്റെ തീരുമാനം.
മമത ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസിൽ പിവി അൻവർ അടുത്തിടെയാണ് അംഗത്വം നേടിയിരിക്കുന്നത്. നിലവിൽ അദ്ദേഹം സംസ്ഥാന കോർഡിനേറ്ററായി പ്രവർത്തിക്കുമെന്ന് സൂചനയുണ്ട്. കൂടാതെ കേരളത്തിലെ പാർട്ടി പ്രവർത്തനങ്ങൾ ഏകോപിപ്പിക്കാൻ എംപിമാരായ സുസ്‌മിത ദേവ്, മഹുവ മൊയ്ത എന്നിവർക്കും മമതാ ബാനർജി പ്രത്യേക ചുമതല നൽകിയിട്ടുണ്ട്.
