സ്വർണവില വീണ്ടും സർവകാല റെക്കോഡിലെത്തി. പവന് 280 രൂപയുടേയും ഗ്രാമിന് 35 രൂപയുടേയും വർധനയാണ് ഉണ്ടായത്.പവന്റെ വില 64,560 രൂപയായും ഗ്രാമിന്റെ വില 8,035 രൂപയായും വർധിച്ചു. ഈ മാസം 11ാം തീയതിയാണ് സ്വർണവില റെക്കോഡിലെത്തിയത് അന്ന് പവന് 64,480 രൂപയും ഗ്രാമിന് 8,035 രൂപയുമായിരുന്നു സ്വർണത്തിന്റെ വില. കഴിഞ്ഞ രണ്ടാഴ്ചക്കിടെ മാത്രം പവന് 2,920 രൂപയുമ ഗ്രാമിന് 365 രൂപയും കൂടി. സ്പോട്ട് ഗോള്‍ഡിന്റെ വിലയില്‍ 0.2 ശതമാനം ഉയർന്നു. ഔണ്‍സിന് 2,937.74 ഡോളറായാണ് വില ഉയർന്നത്. സ്വർണത്തിന്റെ ഭാവി വിലകളിലും വർധന രേഖപ്പെടുത്തിയിട്ടുണ്ട്. 0.7 ശതമാനം വർധനയാണ് സ്വർണത്തിന്റെ ഭാവിവിലകളില്‍ ഉണ്ടായത്. 2,955.90 ഡോളറായാണ് വില ഉയർന്നത്. വിവിധ രാജ്യങ്ങള്‍ക്കുമേല്‍ അധിക ഇറക്കുമതി തീരുവ ചുമത്താനുള്ള ട്രംപിന്റെ നീക്കം തന്നെയാണ് സ്വർണവില ഉയരാനുള്ള പ്രധാന കാരണം. ചൈനീസ് ഇറക്കുമതിക്ക് 10 ശതമാനവും സ്റ്റീല്‍, അലുമിനിയം പോലുള്ള ഉല്‍പന്നങ്ങളുടെ ഇറക്കുമതി 25 ശതമാനവും ട്രംപ് ഇറക്കുമതി തീരുവ ഏർപ്പെടുത്തിയിരുന്നു. അധിക തീരുവ പണപ്പെരുപ്പം കൂട്ടുമെന്ന് ആശങ്കയുണ്ട്. ഇത് സുരക്ഷിത നിക്ഷേപമായ സ്വർണത്തിന്റെ വില ഉയരുന്നതിന് ഡിമാൻഡ് വർധിപ്പിക്കുന്നുണ്ട്.
