സംസ്ഥാനത്ത് സ്വർണവില എക്കാലത്തെയും ഉയർന്ന നിരക്കില്‍. ഇന്ന് 22 കാരറ്റ് സ്വർണത്തിന് ഒരു ഗ്രാമിന്റെ വില 20 രൂപ വർധിച്ച്‌ 8360 രൂപയിലെത്തി. ഇതോടെ ഒരു പവന്റെ വില 160 രൂപ ഉയർന്ന് 66880 രൂപയായിരിക്കുകയാണ്. തൊട്ടു മുൻപത്തെ ദിവസമായ വെള്ളിയാഴ്ച (മാർച്ച്‌ 28) രേഖപ്പെടുത്തിയ ഗ്രാമിന് 8340 രൂപയും പവന് 66720 രൂപയെന്ന റെക്കോർഡ് ആണ് ഇതോടെ പഴങ്കഥയായത്.
നാല് ദിവസത്തിനിടെ പവന് 1400 രൂപയുടെ വർധനവാണ് രേഖപ്പെടുത്തിയിരിക്കുന്നത്. സ്വർണവ്യാപാരി സംഘടനകള്‍ക്കിടയില്‍ ഭിന്നത നിലനില്‍ക്കുന്നുണ്ടെങ്കിലും 22 കാരറ്റ് സ്വർണത്തിന് സംസ്ഥാനത്ത് ഒരേ വിലയാണ് ഈടാക്കുന്നത്. ഈ വില വർദ്ധനവ് സ്വർണാഭരണങ്ങള്‍ വാങ്ങാൻ ഉദ്ദേശിക്കുന്ന സാധാരണക്കാരെ സംബന്ധിച്ചിടത്തോളം വലിയ തിരിച്ചടിയാണ് നല്‍കുന്നത്.
