പാൻകാർഡിന്റെറെ പേരിൽ പുതിയ തട്ടിപ്പ് നടക്കുന്നതായി നാഷണൽ പേയ്മെൻ്റ് കോർപ്പറേഷൻ ഓഫ് ഇന്ത്യ(എൻപിസിഐ) അറിയിച്ചു. 2.0 ലേക്ക് പാൻ കാർഡ് അപ്ഗ്രേഡ് ചെയ്യണമെന്ന രീതിയിൽ എത്തുന്ന സന്ദേശങ്ങളിൽ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി. ‘നിങ്ങളുടെ പാൻ കാർഡ് ബ്ലോക്ക് ചെയ്തിരിക്കുന്നു. പാൻ കാർഡ് 2.0 ലേക്ക് അപ്ഗ്രേഡ് ചെയ്യാൻ, നിങ്ങളുടെ ആധാർ നമ്പറും ബാങ്ക് അക്കൗണ്ട് വിശദാംശങ്ങളും നൽകുക’, ഇത്തരത്തിലായിരിക്കും സന്ദേശം വരാൻ സാധ്യതയെന്നും എൻപിസിഐ അറിയിച്ചു.
പലരും ഈ തട്ടിപ്പിൽ വീഴുകയും സ്വന്തം സാമ്പത്തിക വിവരങ്ങൾ കൈമാറുകയും ചെയ്യുന്നു. ഇതുവഴി അക്കൗണ്ടുകളിൽ നിന്ന് പണം നഷ്‌ടമാകുമെന്നും അധികൃതർ മുന്നറിയിപ്പിൽ പറയുന്നു. ‘പാൻ കാർഡ് 2.0 അപ്ഗ്രേഡ് ചെയ്യാനെന്ന വ്യാജേന തട്ടിപ്പുകാർ വ്യക്തികളുടെ ബാങ്കിങ്, വ്യക്തിഗത വിവരങ്ങൾ തേടുന്നതായി എൻപിസിഐ ഔദ്യോഗിക എക്സ് അക്കൗണ്ടിൽ അറിയിച്ചു. ഇത്തരത്തിലുള്ള തട്ടിപ്പുകളിൽ നിന്ന് രക്ഷ നേടാൻ എസ്എംഎസ്, ഇമെയിൽ, സോഷ്യൽ മീഡിയ എന്നിവ വഴി ലഭിക്കുന്ന അജ്ഞാത ലിങ്കുകളിൽ ക്ലിക്ക് ചെയ്യാതിരിക്കുക. കൂടാതെ വ്യക്തിഗത സാമ്പത്തിക വിശദാംശങ്ങൾ ആവശ്യപ്പെടുന്ന കോളുകളിലും സന്ദേശങ്ങളിലും ജാഗ്രത പാലിക്കണമെന്നും നിർദേശമുണ്ട്.
