രണ്ട് വര്‍ഷം മുന്‍പ് പിന്‍വലിച്ച 2000 രൂപയുടെ നോട്ട് ഇനിയും നിങ്ങളുടെ കയ്യില്‍ ഇരിപ്പുണ്ടോ. എന്ത് ചെയ്യണമെന്നറിയാതെ അലമാരയില്‍ വച്ചിരിക്കുകയാണോ ? എന്നാല്‍ വിഷമിക്കേണ്ട. 2000 രൂപ നോട്ടുകള്‍ക്ക് ഇനിയും നിയമപരമായ സാധുതയുണ്ടെന്നാണ് ആര്‍ബിഐ വ്യക്തമാക്കിയിരിക്കുന്നത്.
സാധാരണ ബാങ്ക് ശാഖകളില്‍ 2000 രൂപയുടെ നോട്ടുകള്‍ മാറ്റിയെടുക്കാനുള്ള സൗകര്യം 2023 ഒക്ടോബര്‍ ഏഴ് വരെയായിരുന്നു. എന്നാലും ആര്‍ബിഐ യുടെ 19 ഇഷ്യു ഓഫീസുകളില്‍ ഈ നോട്ടുകള്‍ ഇപ്പോഴും സ്വീകരിക്കുന്നുണ്ട്. നേരിട്ടോ തപാല്‍ വഴിയോ നോട്ട് മാറ്റി എടുക്കാവുന്നതാണ്. ഇന്ത്യാ പോസ്റ്റ് വഴിയും നോട്ട് അയക്കാന്‍ അനുമതി നല്‍കിയിട്ടുണ്ട്. പണം ബാങ്ക് അക്കൗണ്ടിലേക്ക് നല്‍കുകയാണ് ചെയ്യുക.
രണ്ട് വര്‍ഷം മുന്‍പ് പിന്‍വലിച്ചിട്ടും മുഴുവനും തിരികെയെത്താതെ 2,000 രൂപയുടെ നോട്ടുകള്‍ ഇനിയും ജനങ്ങളുടെ കൈവശമുണ്ടെന്നാണ് റിസര്‍വ്വ് ബാങ്ക് പുറത്തുവിട്ട കണക്കുകളില്‍ പറയുന്നത്. 6,181 കോടി രൂപയുടെ നോട്ടുകള്‍ ഇനിയും തിരികെ എത്താനുണ്ടെന്ന് കണക്കുകള്‍ പറയുന്നു.
