തിരുവനന്തപുരം: നെടുമങ്ങാട്ട് ഹോട്ടലിലെ ഗ്യാസ് സിലിണ്ടർ പൊട്ടിത്തെറിച്ച് ഒരാൾ മരിച്ചു. ഹോട്ടലിലെ ഗ്യാസാണ് പൊട്ടിത്തെറിച്ചത്. നെടുമങ്ങാട് മാണിക്യപുരത്താണ് സംഭവം. കടയുടമ വിജയൻ (55) ആണ് മരിച്ചത്. 12 മണിയോടെയാണ് സംഭവം നടന്നത്. ഗ്യാസ് ലീക്കായതാണ് അപകട കാരണമെന്നാണ് ഫയർ ഫോഴ്‌സിന്റെ പ്രാഥമിക നിഗമനം.
അപകടം നടക്കുന്നതിന് തൊട്ടുമുമ്പ് ഭാര്യ ചെറുമകനുമായി പുറത്തേക്ക് പോയി. കടയിൽ മറ്റാരുമില്ലാത്ത സമയത്താണ് അപകടമുണ്ടായത്. പൊട്ടിത്തെറിയുടെ ശബ്ദം കേട്ടാണ് നാട്ടുകാർ ഓടിക്കൂടുന്നത്. അപ്പോഴേക്കും കട പൂർണമായി കത്തി നശിച്ചിരുന്നു. ഫയർഫോഴ്സെത്തി തീയണച്ചെങ്കിലും രക്ഷിക്കാനായില്ല. വിജയൻ തത്ക്ഷണം മരിച്ചു. ശരീരം പൂർണമായും കത്തിയമർന്ന നിലയിലായിരുന്നു.
