പ്ലാസ്റ്റിക് പാത്രങ്ങൾ സ്ഥിരമായി ഉപയോഗിക്കുന്നവരാണോ? പതിയിരിക്കുന്ന അപകടങ്ങൾ തിരിച്ചറിയാം

നമ്മുടെ വീടുകളിൽ പ്ലാസ്റ്റിക് പാത്രങ്ങൾ സർവസാധാരണമാണ്  ഉപയോഗിക്കാൻ സൗകര്യപ്രദവുമാണ് എന്നാൽ, പ്ലാസ്റ്റിക് അടിസ്ഥാനഘടകമായി നിർമിക്കപ്പെടുന്ന പാത്രങ്ങളിലെ രാസവസ്തുക്കളുടെ ദൂഷ്യവശം കണ്ടെത്തിയിരിക്കുകയാണ് വിദഗ്ധർ. ബിപിഎ, താലേറ്റ്സ് പോലുള്ള രാസവസ്തുക്കൾ ആരോഗ്യപരമായ അപകടസാധ്യതകൾ ഉയർത്തുന്നു. ഇവ മനുഷ്യശരീരത്തിലെ ഹോർമോണുകളുടെ പ്രവർത്തനത്തെ തടസ്സപ്പെടുത്തുകയും ഗുരുതരമായ രോഗങ്ങൾക്ക് കാരണമാകുകയും ചെയ്യും. സ്റ്റെയിൻലെസ് സ്റ്റീൽ അല്ലെങ്കിൽ സെറാമിക് പോലുള്ള സുരക്ഷിതവും സുസ്ഥിരവുമായ ബദലുകളിലേക്ക് മാറാൻ വിദഗ്ദ്ധർ നിർദ്ദേശിക്കുന്നു.

ഏതാനും വർഷങ്ങൾക്ക് മുമ്പുവരെ നാമെല്ലാവരും വീടുകളിൽ പ്ലാസ്റ്റിക് പാത്രങ്ങൾ ഉപയോഗിക്കുകയും അത് ഇഷ്ടപ്പെടുകയും ചെയ്തിരുന്നു. പിന്നീട്‌, പ്ലാസ്റ്റിക് ഉൽപന്നങ്ങളുടെ അപകടസാധ്യത മുൻനിർത്തി അതിന്റെ ഉപയോഗം കുറയ്‌ക്കുകയായിരുന്നു. എന്നാൽ, ഇന്നും രാജ്യത്തുടനീളമുള്ള വീടുകളിൽ പ്ലാസ്റ്റിക് പ്ലേറ്റുകളും പാത്രങ്ങളും കപ്പുകളും അടുക്കളയിലെ പ്രധാന സാമഗ്രികളായി തുടരുന്നു. കാരണം, അവ ഭാരം കുറഞ്ഞതും വില കുറഞ്ഞതും കുട്ടികൾക്ക് ഉപയോഗിക്കാൻ എളുപ്പമുള്ളതുമാണ്. എന്നാൽ, ഈ സൗകര്യങ്ങളെല്ലാം ഗുരുതരമായ ആരോഗ്യപ്രശ്നങ്ങളെ മറച്ചുവെച്ചേക്കാം. വീട്ടിൽ പ്ലാസ്റ്റിക് പാത്രങ്ങൾ ഉപയോഗിക്കുന്നതിലെ അപകടങ്ങളെക്കുറിച്ച് കൂടുതൽ വിദഗ്ദ്ധർ ഇപ്പോൾ മുന്നറിയിപ്പ് നൽകുന്നു. നിങ്ങളുടെ പ്ലാസ്റ്റിക് പാത്രങ്ങൾ യഥാർത്ഥത്തിൽ എത്രത്തോളം സുരക്ഷിതമാണ്? ഇത് നിങ്ങളുടെയോ നിങ്ങളുടെ കുടുംബത്തിന്റെയോ ആരോഗ്യത്തെ ബാധിക്കുന്നുണ്ടോയെന്ന് എങ്ങനെ തിരിച്ചറിയാം?

ബിസ്ഫെനോൾ എന്ന സിന്തറ്റിക് രാസവസ്തു

പല പ്ലാസ്റ്റിക് പ്ലേറ്റുകളും കപ്പുകളും കണ്ടെയ്‌നറുകളും ലഞ്ച് ബോക്സുകളും ബിപിഎ പോലുള്ള രാസവസ്തുക്കൾ ഉപയോഗിച്ചാണ് നിർമ്മിക്കുന്നത്. നിങ്ങളുടെ പ്ലാസ്റ്റിക് പാത്രങ്ങൾ, പ്രത്യേകിച്ച് പഴയതോ വില കുറഞ്ഞതോ ആയവ മറിച്ചുനോക്കിയാൽ, അടിയിൽ “BPA” അല്ലെങ്കിൽ “BPA-free” പോലുള്ള അടയാളങ്ങൾ കാണാം. ബിപിഎ എന്നാൽ ബിസ്ഫെനോൾ എ (Bisphenol A). പ്ലാസ്റ്റിക്കുകൾക്ക് ആകൃതിയും വഴക്കവും നൽകാൻ ഉപയോഗിക്കുന്ന ഒരു സിന്തറ്റിക് രാസവസ്തുവാണിത്. എന്നാൽ, ശരീരത്തിലെ ഹോർമോൺ സംവിധാനങ്ങളെ തടസ്സപ്പെടുത്തുന്ന ‘എൻഡോക്രൈൻ ഡിസ്റപ്റ്റേഴ്സ്’ എന്നറിയപ്പെടുന്ന രാസവസ്തുക്കളിൽ ഏറ്റവും കുപ്രസിദ്ധമായ ഒന്നുകൂടിയാണിത്.

എന്തുകൊണ്ടാണ് ബിപിഎ ഹാനികരം?

ബിപിഎയും സാധാരണയായി കാണുന്ന മറ്റൊരു സംയുക്തമായ താലേറ്റ്സും ഈസ്ട്രജൻ, ടെസ്റ്റോസ്റ്റിറോൺ തുടങ്ങിയ ഹോർമോണുകളെ ബാധിക്കാൻ കഴിവുള്ള എൻഡോക്രൈൻ ഡിസ്റപ്റ്ററുകളാണ്. ശാരീരിക വികാസത്തിനും പ്രത്യുൽപാദന ആരോഗ്യത്തിനും മൊത്തത്തിലുള്ള വളർച്ചയ്ക്കും ഈ ഹോർമോണുകൾ നിർണായകമായതിനാൽ കുട്ടികളുടെ കാര്യത്തിൽ ഇത് പ്രത്യേക ആശങ്കയുണ്ടാക്കുന്നു.

ഈ രാസവസ്തുക്കൾ കുട്ടികളിലെ സ്വാഭാവിക വികാസത്തെ തടസ്സപ്പെടുത്തുകയും ദീർഘകാല ആരോഗ്യപ്രശ്നങ്ങൾക്ക് കാരണമാവുകയും ചെയ്യുമെന്ന് യുണൈറ്റഡ് സ്റ്റേറ്റ്സിലെ പീഡിയാട്രിക് എൻവയോൺമെന്റൽ ഹെൽത്ത് സ്പെഷ്യാലിറ്റി യൂണിറ്റും (PEHSU) മുന്നറിയിപ്പ് നൽകിയിട്ടുണ്ട്.

ബിപിഎ അടങ്ങിയ പ്ലാസ്റ്റിക് പാത്രങ്ങൾ ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നത് എന്തുകൊണ്ട്?

സാൻഫ്രാൻസിസ്കോയിലെ പ്രൊഫസറായ പ്രശസ്ത വിദഗ്ദ്ധ ഡോ. ട്രേസി വുഡ്റഫ് ചൂണ്ടിക്കാണിക്കുന്നത്, ബിപിഎ, താലേറ്റ്സ്, പിഎഫ്എഎസ് (പ്ലാസ്റ്റിക്കുകളിൽ സാധാരണയായി ഉപയോഗിക്കുന്ന മറ്റൊരു സിന്തറ്റിക് സംയുക്തം) പോലുള്ള രാസവസ്തുക്കൾക്ക് മനുഷ്യ ഹോർമോണുകളെ അനുകരിക്കാൻ കഴിയുമെന്നാണ്. ഈ ഇടപെടൽ പ്രത്യുൽപാദന പ്രശ്നങ്ങൾ, വന്ധ്യത, ഭ്രൂണത്തിന്റെ മോശം വളർച്ച, ചിലതരം അർബുദങ്ങൾ എന്നിവയുൾപ്പെടെ നിരവധി ആരോഗ്യപ്രശ്നങ്ങളുമായി ബന്ധപ്പെട്ടിരിക്കുന്നു.

ചൈനീസ് ഗവേഷകർ നടത്തിയ രണ്ട് ഭാഗങ്ങളുള്ള ഒരു പഠനം ഈ ആശങ്കകൾക്ക് മറ്റൊരു തലം നൽകി. പ്ലാസ്റ്റിക്കുമായുള്ള സമ്പർക്കം ഹൃദയസംബന്ധമായ രോഗങ്ങളുടെ (CVD) സാധ്യത വർദ്ധിപ്പിക്കുമെന്ന് പഠനം കണ്ടെത്തി. ഭക്ഷണത്തിലേക്ക് അലിഞ്ഞുചേരുന്ന പ്ലാസ്റ്റിക് രാസവസ്തുക്കൾ കുടലിലെ സൂക്ഷ്മാണുക്കളെ എങ്ങനെ മാറ്റുന്നുവെന്നും, ഓക്സിഡേറ്റീവ് സ്ട്രെസ് ഉണ്ടാക്കുകയും ചെയ്യുന്നുവെന്നും പഠനം വിശദീകരിച്ചു. ഇവ ഹൃദയവൈകല്യങ്ങൾക്ക് കാരണമാകുന്ന ഘടകങ്ങളാണ്. കൂടുതൽ ഗുരുതരമായ കേസുകളിൽ, ശരീരത്തിൽ പ്ലാസ്റ്റിക് അടിഞ്ഞുകൂടുന്നത് വൃക്കയിലെ കല്ലുകൾ, വൃക്കസ്തംഭനം എന്നിവയുമായി ബന്ധപ്പെട്ടിരിക്കുന്നു.

പാത്രങ്ങളിൽ നിന്നുള്ള മൈക്രോപ്ലാസ്റ്റിക്കുകൾ ശരീരത്തിൽ അടിഞ്ഞുകൂടുമോ?

മൈക്രോപ്ലാസ്റ്റിക്കുകളെക്കുറിച്ചുള്ള അവബോധം വർദ്ധിക്കുന്നതിനനുസരിച്ച്, അവ മനുഷ്യശരീരത്തിൽ എത്രത്തോളം ആഴത്തിൽ പ്രവേശിക്കുന്നുവെന്ന ഗവേഷണം നടന്നുകൊണ്ടിരിക്കുകയാണ്. മനുഷ്യരക്തം, ശ്വാസകോശം, കരൾ, മറുപിള്ള എന്നിവയിൽ പോലും മൈക്രോപ്ലാസ്റ്റിക്കുകൾ കണ്ടെത്തിയിട്ടുണ്ട്. ദിവസേനയുള്ള പ്ലാസ്റ്റിക് പാത്രങ്ങളുടെ ഉപയോഗം, പ്രത്യേകിച്ച് ചൂടുള്ളതോ അമ്ലാംശമുള്ളതോ എണ്ണമയമുള്ളതോ ആയ ഭക്ഷണങ്ങൾക്കൊപ്പം ഈ സമ്പർക്കം ത്വരിതപ്പെടുത്തും.

പ്ലാസ്റ്റിക് വിഘടിക്കുമ്പോഴോ ചൂടാകുമ്പോഴോ ചെറിയ പ്ലാസ്റ്റിക് കണികകൾ ഭക്ഷണത്തിലേക്കും പാനീയങ്ങളിലേക്കും കലരാം. കാലക്രമേണ ഇത് വർദ്ധിക്കുന്നു. എൻവയോൺമെന്റൽ സയൻസ് & ടെക്നോളജിയിൽ പ്രസിദ്ധീകരിച്ച ഒരു പഠനമനുസരിച്ച്, ഒരു സാധാരണ വ്യക്തി ഓരോ വർഷവും പതിനായിരക്കണക്കിന് മൈക്രോപ്ലാസ്റ്റിക് കണികകൾ കഴിക്കാൻ സാധ്യതയുണ്ട്. ഇതിന്റെ പൂർണ്ണമായ ആരോഗ്യപരമായ പ്രത്യാഘാതങ്ങൾ ഇപ്പോഴും പഠനവിധേയമാണെങ്കിലും വീക്കം, ഉപാപചയ തകരാറുകൾ, ഓട്ടോ ഇമ്മ്യൂൺ രോഗങ്ങൾ എന്നിവയുമായുള്ള ഇതിന്റെ ബന്ധത്തെക്കുറിച്ച് ശാസ്ത്രജ്ഞർക്ക് ആശങ്ക വർധിച്ചുവരികയാണ്.