കണ്ണൂർ: വന്യജീവി സംരക്ഷണ നിയമം 2022 ഷെഡ്യൂൾ 1 ൽപ്പെട്ട പെരുമ്പാമ്പിനെ പിടികൂടി കൊന്ന് ഇറച്ചിയാക്കി കഴിച്ച കുറ്റത്തിന് രണ്ടു പേരെ ഫോറസ്റ്റ് ഉദ്യോഗസ്ഥർ പിടികൂടി.കണ്ണൂർ മാതമംഗലം പാണപ്പുഴ മുണ്ട പ്രത്തെ ഉറുമ്പിൽ ഹൗസിൽ പ്രമോദ് (40), ചന്ദനം ചേരി ഹൗസിൽ ബിനീഷ് (37) എന്നിവരാണ്‌ അറസ്റ്റിലായത്.
തളിപ്പറമ്പ് ഫോറസ്റ്റ് റെയിഞ്ച് ഓഫീസർ പി വി സനൂപ് കൃഷ്ണൻ ലഭിച്ച രഹസ്യവിവരത്തെ തുടർന്ന് നടത്തിയ പരിശോധനയിലാണ് ഇവർ പിടിയിലായത്. തളിപ്പറമ്പ് ഫോറസ്റ്റ് റെയിഞ്ച് ഓഫീസിലെ സ്പെഷ്യൽ ഡ്യൂട്ടി സെക്ഷൻ ഫോറസ്റ്റ് ഓഫീസർ സി പ്രദീപൻ, ബീറ്റ് ഫോറസ്റ്റ് ഓഫീസർമാരായ പി പി രാജീവൻ, എം വീണ, ഡ്രൈവർ ആർ കെ രാജീവ് എന്നിവരടങ്ങുന്ന ഫോറസ്റ്റ് ടീം ആണ് കടന്നപ്പള്ളി – പണപ്പുഴ ഗ്രാമപഞ്ചായത്തിലെ മൂന്നാം വാർഡിലെ 371 നമ്പർ വീട്ടു പരിസരത്ത് വെച്ച് പിടികൂടിയത്. പ്രതികള ഇന്ന് പയ്യന്നൂർ കോടതിയിൽ ഹാജരാക്കുമെന്ന് ഫോറസ്റ്റ് റെയിഞ്ച് ഓഫീസർ പി വി സനൂപ് കൃഷ്ണൻ പറഞ്ഞു
