സുൽത്താൻബത്തേരി: ആയുധധാരികളായ സംഘം രാത്രി ദേശീയപാതയിൽ വാഹനം തടഞ്ഞു നിർത്തി ഭീകരാന്തരീക്ഷം സൃഷ്ടിച്ച് യാത്രക്കാരെ മർദിച്ച് വാഹനമടക്കം കവർന്ന കേസിൽ അഞ്ച് പേർ കൂടി പിടിയിൽ. ഒളിവിലായിരുന്ന തൃശൂർ എടക്കുനി സ്വദേശി നിഷാന്ത് (39), പത്തനംതിട്ട അയിരൂർ സ്വദേശി സിബിൻ ജേക്കബ്ബ് (36), പത്തനംതിട്ട അത്തിക്കയം സ്വദേശി ജോജി (38), പത്തനംതിട്ട എരുമേലി സ്വദേശി സതീഷ് കുമാർ (46), പുൽപ്പള്ളി സീതാമൗണ്ട് സ്വദേശി കെ പി സുബീഷ് (36) എന്നിവരെയാണ് പിടികൂടിയത്. ഇതോടെ സംഘത്തിലെ ഏഴ് പേർ പിടിയിലായി.
ഹൈവേയിൽ യാത്ര ചെയ്യുന്ന വാഹനങ്ങൾ തടഞ്ഞ് പണവും സ്വർണവും മറ്റും മോഷ്ടിക്കണമെന്ന ഉദ്ദേശ്യത്തോടെ മാരകായുധങ്ങളുമായെത്തിയ സംഘമാണ് മുത്തങ്ങക്കടുത്ത കല്ലൂർ 67 എന്ന സ്ഥലത്ത് വെച്ച് കാർ തടഞ്ഞിട്ട് അക്രമം നടത്തിയത്. നവംബർ നാലിന് രാത്രിയാണ് സംഭവം. കോഴിക്കോട് * സ്വദേശിയും ഡ്രൈവറും ബിസിനസ് ആവശ്യത്തിനായി ബെംഗളുരുവിൽ പോയി തിരിച്ചു വരവെ ഈ സംഘം രണ്ട് കാറുകളിലും ചരക്ക് വാഹനത്തിലുമായി പിന്തുടരുകയായിരുന്നു. കല്ലൂർ 67 പാലത്തിന് സമീപംവെച്ച് ഇന്നോവ വാഹനം തടഞ്ഞുനിർത്തി ഹാമർ കൊണ്ട് വാഹനത്തിന്റെ വിൻഡോ ഗ്ലാസ് അടിച്ചു പൊളിച്ച് ഭീകരാന്തരീക്ഷം സൃഷ്ടിച്ച ശേഷം ഇവരെ വാഹനത്തിൽ നിന്ന് വലിച്ചിറക്കി പുറത്തിട്ട് മർദിക്കുകയും ഭീഷണിപ്പെടുത്തുകയുംചെയ്യുകയായിരുന്നു. വാഹനത്തോടൊപ്പം ഇതിലുണ്ടായിരുന്ന ലാപ്ടോപ്പ്, ടാബ്, മൊബൈൽ ഫോൺ, ബാഗുകൾ തുടങ്ങിയവയും കവർന്നു.
