ന്യൂഡൽഹി : പാൻകാർഡ് ആധാർ കാർഡുമായി ബന്ധിപ്പിക്കാനുള്ള അവസാന തീയതി ഡിസംബർ 31 ആണ്. ഈ സമയപരിധിക്കുള്ളിൽ ലിങ്ക് ചെയ്യാത്തവരുടെ പാൻ കാർഡുകൾ 2026 ജനുവരി ഒന്നു മുതൽ പ്രവർത്തനരഹിതമാകും. ഇത് വരുമാനം, നിക്ഷേപങ്ങൾ, നികുതി റീഫണ്ടുകൾ എന്നിവയെ നേരിട്ട് ബാധിക്കുമെന്നും ശമ്പളം ഉൾപ്പെടെ തടസ്സപ്പെടുമെന്നും ടാക്സ് ഫയലിങ് പ്ലാറ്റ്ഫോമായ ടാക്സ് ബഡ്ഡി മുന്നറിയിപ്പ് നൽകുന്നു. നികുതി സമ്പ്രദായം കൂടുതൽ സുതാര്യമാക്കുന്നതിൻ്റെ ഭാഗമായാണ് പാൻ ആധാറുമായി ബന്ധിപ്പിക്കൽ സർക്കാർ നിർബന്ധമാക്കിയത്. 2025 ജൂലൈ ഒന്നിന് ശേഷം പുതിയ പാൻ കാർഡിന് അപേക്ഷിക്കുന്നവർക്ക്, അപേക്ഷാ പ്രക്രിയയിൽ തന്നെ ഈ ലിങ്കിങ് ഓട്ടോമാറ്റിക്കായി പൂർത്തിയായിരിക്കും.
നിശ്ചിത സമയപരിധിക്കുള്ളിൽ പാൻ-ആധാർ ബന്ധിപ്പിക്കാൻ സാധിക്കാതെ വന്നാൽ ജനുവരി ഒന്നു മുതൽ ചില പ്രതിസന്ധികൾ നേരിടാം..
1. ഐ.ടി.ആർ ഫയൽ ചെയ്യാൻ കഴിയില്ല.
2. ഫയൽ ചെയ്ത്‌ത റിട്ടേണുകളുടെ പ്രോസസിങ്ങും റീഫണ്ടുകളും നിർത്തലാക്കും.
3. ഉയർന്ന നിരക്കിലുള്ള ടി.ഡി.എസ്/ടി.സി.എസ്.
4. ബാങ്ക് ഇടപാടുകൾ, നിക്ഷേപങ്ങൾ, എസ്ഐപികൾ എന്നിവ തടസ്സപ്പെട്ടേക്കാം.
5. ഓഹരി വിപണി, മ്യൂച്വൽ ഫണ്ട് ഇടപാടുകൾ, കെവൈസി അപ്ഡേറ്റുകൾ എന്നിവ നടത്താൻ കഴിയില്ല.
പാൻ പ്രവർത്തനരഹിതമായാലും നിലവിലുള്ള ബാങ്ക് അക്കൗണ്ടുകൾക്കോ നിക്ഷേപങ്ങൾക്കോ പ്രശ്ന‌മില്ല. എന്നാൽ, പുതിയ നിക്ഷേപങ്ങൾ നടത്താനോ എസ്ഐപികൾ ആരംഭിക്കാനോ അവസാനിപ്പിക്കാനോ ഓഹരികൾ വാങ്ങാനോ വിൽക്കാനോ സാധിക്കില്ല. അതായത്, പാൻ വീണ്ടും പ്രവർത്തനക്ഷമമാകുന്നതുവരെ സാമ്പത്തിക ഇടപാടുകൾ സ്‌തംഭിക്കും. നിശ്ചിത തീയതിക്കുശേഷം ബന്ധിപ്പിച്ചാൽ 30 ദിവസത്തിനുള്ളിൽ പാൻ വീണ്ടും പ്രവർത്തനക്ഷമമാകും. വൈകി ബന്ധിപ്പിക്കുന്നതിന് 1000 രൂപ പിഴ നൽകേണ്ടി വരും.
