കൊളംബോ:കാഴ്ചപരിമിതർക്കായുള്ള പ്രഥമ വനിതാ ലോകകപ്പ് T-20 ക്രിക്കറ്റ് കിരീടം ഇന്ത്യക്ക്. കൊളംബോയിൽ നടന്ന കലാശപ്പോരാട്ടത്തിൽ നേപ്പാളിനെ ഏഴു വിക്കറ്റിനാണ് ഇന്ത്യ പരാജയപ്പെടുത്തിയത്.
ടോസ് നേടിയ ഇന്ത്യ നേപ്പാളിനെ ബാറ്റിങ്ങിനയച്ചു. 20 ഓവറിൽ അഞ്ച് വിക്കറ്റിന് 114 റൺസെടുക്കാനേ നേപ്പാളിനായുള്ളു. ഇന്ത്യ 12.1 ഓവറിൽ മൂന്ന് വിക്കറ്റ് നഷ്ടത്തിൽ 117 റൺസെടുത്ത് ജയത്തിലെത്തി. 27 പന്തിൽ 44 റൺസെടുത്ത ഫുല സരണും 27 പന്തിൽ 42 റൺസ് നേടിയ കരുണകുമാരിയുമാണ് ഇന്ത്യയെ അനായാസജയത്തിലേക്ക് എത്തിച്ചത്. ഫുല സരണാണ് കളിയിലെ താരം.നേപ്പാൾ ഇന്നിങ്സിൽ സരിത 38 പന്തിൽ 34 റൺസെടുത്ത് ടോപ് സ്കോററായി. ഇന്ത്യക്കായി ജമുനാ റാണി തുഡു, അനുകമാരി എന്നിവർ ഓരോ വിക്കറ്റെടുത്തു. ടി.സി. ദീപികയാണ് ഇന്ത്യൻ ടീമിനെ നയിച്ചത്.
