ജോഹന്നാസ്ബർഗ് :മാനവികത, തുല്യത, ആഗോള സഹകരണം എന്നിവയിൽ ശ്രദ്ധ കേന്ദ്രീകരിക്കുന്ന ഒരു മാതൃകയാകാന്‍ ജി-20 രാജ്യങ്ങളോട് ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. സാങ്കേതികവിദ്യ മനുഷ്യ കേന്ദ്രീകൃതമായിരിക്കണമെന്നും അദ്ദേഹം പറഞ്ഞു. ഇന്ത്യയുടെ ഡിജിറ്റൽ ആവാസവ്യവസ്ഥ ഈ ദർശനം പിന്തുടരുന്നതായും അദ്ദേഹം പറഞ്ഞു. ജോഹന്നാസ്ബർഗിൽ നടന്ന ജി20 നേതാക്കളുടെ ഉച്ചകോടിയെ അഭിസംബോധന ചെയ്യുകയായിരുന്നു പ്രധാനമന്ത്രി. സർവജന ഹിതായ, സർവജന സുഖായ എന്ന പ്രമേയത്തിൽ 2026 ഫെബ്രുവരിയിൽ ഇന്ത്യ എഐ ഇംപാക്ട് ഉച്ചകോടിക്ക് ആതിഥേയത്വം വഹിക്കുമെന്നും പ്രധാനമന്ത്രി അറിയിച്ചു.
ലോകം പുരോഗതിയെ എങ്ങനെ അളക്കുന്നു എന്നതിനെക്കുറിച്ച് പുനർവിചിന്തനം നടത്തേണ്ട നിമിഷമാണിതെന്ന് അദ്ദേഹം പറഞ്ഞു. വിഭവ ദാരിദ്ര്യവും പാരിസ്ഥിതിക അസന്തുലിതാവസ്ഥയും നേരിടുന്ന പ്രദേശങ്ങളെ സംബന്ധിച്ച് ഇത് അനിവാര്യമാണെന്നും ഇന്ത്യയുടെ ഏകാത്മ മാനവവാദം എന്ന തത്വം കൂടുതൽ സമതുലിതമായ വളർച്ചയ്ക്ക് ഒരു മാതൃക നൽകുന്നുവെന്നും അദ്ദേഹം പറഞ്ഞു. അറിവ്, വൈദഗ്‌ധ്യം, സുരക്ഷ എന്നിവയിലെ സഹകരണം പുനഃക്രമീകരിക്കാൻ ലക്ഷ്യമിട്ടുള്ള മൂന്ന് പ്രധാന നിർദ്ദേശങ്ങളും പ്രധാനമന്ത്രി മുന്നോട്ടുവെച്ചു.
സുസ്ഥിര ജീവിതത്തിനായുള്ള കാലങ്ങളായി പരീക്ഷിച്ചു വിജയിച്ച മാതൃകകൾ സംരക്ഷിക്കണമെന്ന് ആഹ്വാനം ചെയ്‌തുകൊണ്ട്, ജി20-ക്ക് കീഴിൽ ഒരു ആഗോള വിജ്ഞാന ശേഖരം പ്രധാനമന്ത്രി നിർദേശിച്ചു. ലോകം കാലാവസ്ഥാ പ്രതിസന്ധിയും അതിവേഗം മാറുന്ന ജീവിതശൈലികളും നേരിടുന്ന ഈ സമയത്ത്, ആരോഗ്യം, പരിസ്ഥിതി, സാമൂഹിക ഐക്യം എന്നിവ സംബന്ധിച്ച പരമ്പരാഗത അറിവുകൾ രേഖപ്പെടുത്തുകയും പങ്കുവെക്കുകയും ഭാവി തലമുറകൾക്ക് കൈമാറ്റം ചെയ്യപ്പെടുകയും ചെയ്യുന്നുവെന്ന് ഉറപ്പാക്കുക എന്നതാണ് ഈ ശേഖരത്തിന്റെ ലക്ഷ്യമെന്നും അദ്ദേഹം പറഞ്ഞു.
