കണ്ണൂർ: നിർമ്മാണത്തിലുള്ല വീടിന്റെ സെപ്റ്റിക് ടാങ്കിൽ വീണ് മൂന്ന് വയസുകാരൻ മരിച്ചു. കതിരൂർ പുല്യോട് വെസ്റ്റ് പാട്യം നഗർ മലമ്മൽ ഹൗസിൽ അൻഷിലിന്റെയും ഫാത്തിമയുടെയും മകൻ മുഹമ്മദ് മർവാനാണ് മരിച്ചത്. ഇന്നലെ വൈകുന്നേരം അങ്കണവാടിയിൽ നിന്ന് വീട്ടിൽ എത്തിയ ശേഷം അടുത്തുള്ള വീട്ടിൽ കളിക്കാൻ പോയതായിരുന്നു മർവാൻ. തിരിച്ചെത്താത്തതിനെ തുടർന്ന് വീട്ടുകാരും അയൽവാസികളും ചേർന്ന് നടത്തിയ തെരച്ചിലിലാണ് കുടുംബ വീടിനോട് ചേർന്ന് നിർമ്മിക്കുന്ന വീടിന്റെ സെപ്റ്റിക് ടാങ്കിൽ വീണ് കിടക്കുന്ന നിലയിൽ കുട്ടിയെ കണ്ടത്. ടാങ്കിൽ സിമന്റ് തേച്ചതിന് ശേഷം ചോർച്ച പരിശോധിക്കാൻ വെള്ളം നിറച്ചിരുന്നു. ഇതിലേക്കാണ് കുട്ടി വീണത്. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.കുഞ്ഞിന്റെ പോസ്റ്റ്മോർട്ടം ഇന്ന് നടക്കും
