കൽപ്പറ്റ: കൽപ്പറ്റ ബൈപ്പാസ് റോഡിലെ ഫ്ലവർ ഷോ ഗ്രൗണ്ടിൽ നടന്നുവരുന്ന മലബാർ ഗ്രാൻഡ് ഫെസ്റ്റ് മെയ് 5 വരെ നീട്ടി. ജനത്തിരക്കും പൊതുജനങ്ങളുടെ ആവശ്യവും പരിഗണിച്ച് മേള ദീർഘിപ്പിക്കാൻ തീരുമാനിച്ചതായി സംഘാടകർ വാർത്താ സമ്മേളനത്തിൽ അറിയിച്ചു. ആഘോഷങ്ങൾക്ക് മാറ്റുകൂട്ടി ഏഴാം ക്ലാസ് വരെയുള്ള വിദ്യാർത്ഥികൾക്ക് പ്രവേശനം സൗജന്യമാക്കിയതായും സംഘാടകർ വ്യക്തമാക്കി.
സ്നേഹ ഇവന്റ്സിന്റെ നേതൃത്വത്തിൽ മാർച്ച് 20-നാണ് കൽപ്പറ്റയിൽ മലബാർ ഗ്രാൻഡ് ഫെസ്റ്റ് ആരംഭിച്ചത്. വയനാട്ടിൽ ആദ്യമായി എത്തുന്ന താജ്മഹൽ മാതൃക, സറൈൽ വെള്ളച്ചാട്ടം, അവതാർ വേൾഡ് എന്നിവയാണ് മേളയിലെ പ്രധാന ആകർഷണങ്ങൾ. കുട്ടികൾക്കും മുതിർന്നവർക്കും ഒരുപോലെ ആസ്വദിക്കാവുന്ന ദിനോസർ വേൾഡ്, വൈൽഡ് ആനിമൽ പാർക്ക്, വിപുലമായ അമ്യൂസ്മെന്റ് പാർക്ക് എന്നിവയും ഗ്രൗണ്ടിൽ സജ്ജീകരിച്ചിട്ടുണ്ട്.
വിവിധ ഉൽപ്പന്നങ്ങൾ ആകർഷകമായ വിലക്കുറവിൽ സ്വന്തമാക്കാവുന്ന പ്രദർശന വിപണന മേളയും ഫെസ്റ്റിന്റെ ഭാഗമാണ്. വാർത്താ സമ്മേളനത്തിൽ സ്നേഹ ഇവന്റ്സ് എം.ഡി. അഫ്സൽ തെരുവത്ത്, കോഡിനേറ്റർമാരായ ഷൗക്കത്ത് കൽപ്പറ്റ, സലാം കൽപ്പറ്റ എന്നിവർ പങ്കെടുത്തു. മെയ് 5 വരെ നീട്ടിയ മേളയിലേക്ക് കൂടുതൽ സന്ദർശകരെ സംഘാടകർ പ്രതീക്ഷിക്കുന്നു.
