മാനന്തവാടി : 44-ാം മത് വയനാട് റവന്യൂ ജില്ലാ സ്കൂൾ കലോത്സവത്തിന് പഴശ്ശിയുടെ ചരിത്ര നഗരിയിൽ തിരിതെളിഞ്ഞു. മാനന്തവാടി ഗവ വൊക്കേഷണൽ ഹയർ സെക്കൻഡറി സ്കൂളിൽ നാല് ദിവസങ്ങളിലെ നടക്കുന്ന കൗമാര കലാമേള ജില്ലാ കളക്ടർ ഡി. ആർ മേഘശ്രീ ഉദ്ഘാടനം ചെയ്തു. 44 പ്രതിഭകൾ അണിനിരന്ന സ്വാഗത ഗാനത്തോടെയാണ്‌ ഉദ്ഘാടന പരിപാടി ആരംഭിച്ചത്. ജില്ലാ കലോത്സത്തിൻ്റെ രണ്ടാം ദിനത്തിൽ 471 പോയിന്റുകളോടെ മാനന്തവാടി ഉപജില്ല ഒന്നാം സ്ഥാനത്തും 437 പോയിന്റുകളോടെ സുൽത്താൻ ബത്തേരി ഉപജില്ല രണ്ടാം സ്ഥാനത്തും 433 പോയിന്റുകളോടെ വൈത്തിരി ഉപജില്ല മൂന്നാം സ്ഥാനത്തുമാണ്. സ്കൂൾ തലത്തിൽ 90 പോയിന്റോടെ മാനന്തവാടി എം.ജി.എം.എച്ച്.എസ്.എസ് ഒന്നാം സ്ഥാനത്താണ്. 70 പോയിന്റുമായി പിണങ്ങോട് ഡബ്ല്യൂ.ഒ.എച്ച്.എസ്.എസ് രണ്ടാമതും 63 പോയിന്റുമായി മാനന്തവാടി ജി.വി.എച്ച്.എസ്.എസ് മൂന്നാം സ്ഥാനത്തും തുടരുന്നു.
മൂന്നൂറിലധികം മത്സരയിനങ്ങളിൽ മൂവായിരത്തോളം കലാ പ്രതിഭകളാണ് ജില്ലാ കലോത്സവത്തിൽ മാറ്റുരയ്ക്കുന്നത്. കായാമ്പൂ, കനലി, കെത്തളു, കനവ്, കബനി, കാളിന്ദി,കാവ്, കമ്പള തുടങ്ങിയ എട്ട് വേദികളിലാണ് മത്സരങ്ങൾ നടക്കുന്നത്. ഇന്നലെ (നവംബർ 19) വിവിധ വേദികളിലായി കോൽക്കളി, വട്ടപ്പാട്ട്, യക്ഷഗാനം, ഒപ്പന, നാടോടി നൃത്തം, ഭരതനാട്യം, തിരുവാതിര, പദ്യം ചൊല്ലൽ, പ്രസംഗം, മോണോ ആക്ട്, മിമിക്രി, കഥാപ്രസംഗം, സ്കിറ്റ്, കഥ പറയൽ, അറബിഗാനം, ഗദ്ദ്യവായന, ഖുർആൻ പാരായണം, സംഭാഷണം, മുഷാറ, സംഘഗാനം, നാടകം,കുച്ചിപ്പുടി, മോഹിനിയാട്ടം എന്നീ മത്സരയിനങ്ങൾ നടന്നു.
ജില്ലാ വിദ്യാഭ്യാസ ഉപഡയറക്ടർ വി.എ ശശീന്ദ്രവ്യാസ് അധ്യക്ഷനായ ഉദ്ഘാടന പരിപാടിയിൽ സിനിമാ സംവിധായകയും കോസ്റ്റ്യൂം ഡിസൈനറുമായ സ്റ്റെഫി സേവിയർ, സിനിമാതാരം അനു സോനാര, ജില്ലാ വിദ്യാഭ്യാസ ഓഫീസർ സി.വി മൻമോഹൻ, വി.എച്ച്.എസ്.ഇ മേഖല അസിസ്റ്റന്റ് ഡയറക്ടർ വി.ആർ അപർണ, ജില്ലാ പഞ്ചായത്ത് സെക്രട്ടറി ബെന്നി ജോസഫ്, എസ്.എസ്.കെ ജില്ലാ പ്രൊജക്ട് കോ-ഓര്‍ഡിനേറ്റര്‍ അനിൽകുമാർ, ഉപജില്ല വിദ്യാഭ്യാസ ഓഫീസര്‍മാരായ എം. സുനിൽകുമാർ, ടി. ബാബു, ബി.ജെ ഷിജിത, മാനന്തവാടി ജി.വി.എച്ച്.എസ് സ്കൂൾ പ്രിൻസിപ്പാൾ പി.സി തോമസ്, മാനന്തവാടി വി.എച്ച്.എസ്.ഇ പ്രിൻസിപ്പൽ കെ.കെ ജിജി, മാനന്തവാടി ജി.വി.എച്ച്.എസ് സ്കൂൾ വൈസ് പ്രിൻസിപ്പാൾ കെ.കെ സുരേഷ് കുമാർ, പി.ടി.എ പ്രസിഡന്റ് എൻ.ജെ ഷജിത്ത്, സംഘാടക സമിതി അംഗങ്ങൾ എന്നിവർ പങ്കെടുത്തു.
