കൽപ്പറ്റ: വോട്ട് രേഖപ്പെടുത്തിയാൽ മധുരം ലഭിക്കുമെന്ന് കരുതി പോളിംഗ് ബൂത്തിലെത്തിയ കന്നി വോട്ടർക്ക് ഹൽവ കിട്ടാത്തതിൽ പരാതി. വയനാട് കാവുംമന്ദം 142-ാം നമ്പർ ബൂത്തിൽ വോട്ട് ചെയ്ത യുവാവാണ് മധുരം ലഭിക്കാത്തതിനെത്തുടർന്ന് തിരഞ്ഞെടുപ്പ് കമ്മീഷനെയും കളക്ടറേറ്റിലെ കൺട്രോൾ റൂമിനെയും വിളിച്ച് പരാതി ബോധിപ്പിച്ചത്.
ജില്ലാ കളക്ടറുടെ ഔദ്യോഗിക പേജിൽ കന്നി വോട്ടർമാർക്ക് ഹൽവ വിതരണം ചെയ്യുന്ന വീഡിയോ കണ്ടതിനാലാണ് താൻ മധുരം ചോദിച്ചതെന്ന് യുവാവ് പറയുന്നു. വോട്ട് ചെയ്ത ഉടൻ യുവാവ് ഹൽവ ആവശ്യപ്പെട്ടെങ്കിലും തങ്ങളുടെ പക്കൽ ഹൽവയില്ലെന്ന മറുപടിയാണ് ഉദ്യോഗസ്ഥർ നൽകിയത്. ഇതിൽ അതൃപ്തനായാണ് യുവാവ് ഉടൻ തന്നെ തിരുവനന്തപുരത്തെ തിരഞ്ഞെടുപ്പ് കമ്മീഷൻ ഓഫീസിലേക്കും ജില്ലാ കളക്ടറേറ്റിലേക്കും വിളിച്ച് പരാതിപ്പെട്ടത്.
എന്നാൽ, ജില്ലയിലെ എല്ലാ ബൂത്തുകളിലും ഹൽവ വിതരണം ഉണ്ടായിരുന്നില്ല എന്നതാണ് വസ്തുത. വയനാട്ടിലെ ആകെ 715 ബൂത്തുകളിലായി വിതരണം ചെയ്യാൻ വെറും 200 കഷ്ണം ഹൽവ മാത്രമാണ് ഭരണകൂടത്തിന് ലഭ്യമായിരുന്നത്. ഇതിനാൽ കന്നി വോട്ടർമാർ ഏറ്റവും കൂടുതലുള്ള തിരഞ്ഞെടുത്ത മൂന്ന് ബൂത്തുകളിൽ മാത്രമാണ് മധുര വിതരണം നടത്തിയത്. കണിയാമ്പറ്റ യു.പി.എസ്, മീനങ്ങാടി കമ്മ്യൂണിറ്റി ഹാൾ, കുഞ്ഞോം ഗവ. എച്ച്.എസ് എന്നീ ബൂത്തുകളിൽ മാത്രമാണ് ഈ പ്രത്യേക വിതരണം ഉണ്ടായതെന്ന് അധികൃതർ വ്യക്തമാക്കി. യുവാവിന്റെ വേറിട്ട പരാതി ഇപ്പോൾ സോഷ്യൽ മീഡിയയിലും ശ്രദ്ധനേടുകയാണ്.
