ന്യൂഡൽഹി :ഫ്ലൈ ദുബായ് വിമാനത്തിനുള്ളിൽ പൈലറ്റ് ക്യാപ്റ്റൻ സ്മിത് മച്ചാറിന് നേരെ നടന്ന മിഡ്-എയർ ആക്രമണത്തിൽ ദേശീയ അന്വേഷണ ഏജൻസി (എൻഐഎ) കേസ് രജിസ്റ്റർ ചെയ്ത് അന്വേഷണം ആരംഭിച്ചു. വിമാനം ആകാശത്ത് പറന്നുയർന്നുനിൽക്കെ ക്യാപ്റ്റന് നേരെ അപ്രതീക്ഷിതമായി ക്രൂരമായ ഭീകരാക്രമണ ശ്രമം ഉണ്ടാകുകയായിരുന്നു. സംഭവത്തിന്റെ ഗൗരവവും അന്താരാഷ്ട്ര തലത്തിലുള്ള സുരക്ഷാ ഭീഷണിയും കണക്കിലെടുത്താണ് കേസിന്റെ അന്വേഷണം എൻഐഎയ്ക്ക് കൈമാറാൻ കേന്ദ്ര ആഭ്യന്തര മന്ത്രാലയം ഉത്തരവിട്ടത്.
വിമാനത്തിന്റെ സുരക്ഷിതത്വത്തിനും യാത്രക്കാരുടെ ജീവനും ഭീഷണിയുയർത്തിയ സംഭവത്തിൽ ഭീകരവാദ ബന്ധമുണ്ടോ എന്ന കാര്യമാണ് എൻഐഎ പ്രധാനമായും പരിശോധിക്കുന്നത്. വിമാനം പറന്നുയർന്ന ശേഷം കോക്ക്പിറ്റിലേക്ക് അതിക്രമിച്ചു കയറാനും പൈലറ്റിനെ ആക്രമിക്കാനും പ്രതി ശ്രമിച്ചതായി വിവരങ്ങളുണ്ട്. വിമാന ജീവനക്കാരും സഹയാത്രികരും ചേർന്നാണ് അക്രമിയെ കീഴടക്കി ബന്ധിച്ചത്. വിമാനം സുരക്ഷിതമായി ലാൻഡ് ചെയ്ത ഉടൻ തന്നെ ഇയാളെ സുരക്ഷാ സേനയ്ക്ക് കൈമാറിയിരുന്നു.
വ്യോമയാന സുരക്ഷാ നിയമങ്ങൾ പ്രകാരവും ഭീകരവിരുദ്ധ നിയമങ്ങൾ പ്രകാരവുമാണ് എൻഐഎ കേസ് എടുത്തു അന്വേഷണം പുരോഗമിക്കുന്നത്. പ്രതിക്ക് ഏതെങ്കിലും അന്താരാഷ്ട്ര ഭീകരസംഘടനകളുമായി ബന്ധമുണ്ടോ എന്ന് അറിയാൻ രഹസ്യാന്വേഷണ ഏജൻസികളുമായി ചേർന്ന് പരിശോധന നടത്തുന്നുണ്ട്. ആക്രമണത്തിന് ഇരയായ ക്യാപ്റ്റൻ സ്മിത് മച്ചാറിൽ നിന്നും വിമാനത്തിലെ മറ്റ് ജീവനക്കാരിൽ നിന്നും എൻഐഎ ഉദ്യോഗസ്ഥർ ഉടൻ തന്നെ മൊഴി രേഖപ്പെടുത്തും.
