കോഴിക്കോട്:പശ്ചിമ ബംഗാളിലെ ബർധമാനിൽ നിന്നും എത്തുന്ന മലയാളികളുടെ പ്രിയപ്പെട്ട കൈമ (ജീരകശാല) അരിയുടെ ഉൽപ്പാദനം കുറയുകയും വില കുത്തനെ ഉയരുകയും ചെയ്തതോടെ മലപ്പുറം ഉൾപ്പെടെയുള്ള മലബാറിലെ ഹോട്ടൽ മേഖല കടുത്ത പ്രതിസന്ധിയിൽ. കൈമ അരിയുടെ ലഭ്യതക്കുറവ് കാരണം ‘കോലം’, ‘ബസുമതി’ തുടങ്ങിയ നീളൻ അരികളാണ് പല ഹോട്ടലുകളും ഇപ്പോൾ ബിരിയാണിക്കായി പരീക്ഷിച്ചു തുടങ്ങിയിരിക്കുന്നത്.
എന്നാൽ, തനത് രുചിയിൽ നിന്നും മാറിയുള്ള ഈ നീളൻ അരിയുടെ ബിരിയാണിയോട് പൊരുത്തപ്പെടാനാകാതെ ഭക്ഷണപ്രേമികൾ പരാതിപ്പെടുന്നതായി ഹോട്ടൽ ഉടമകൾ. കഴിഞ്ഞ രണ്ട് വർഷത്തോളമായി കൈമ അരിയുടെ ലഭ്യതക്കുറവും വിലവർധനവും ഹോട്ടലുകാരെ വലയ്ക്കുകയാണ്. അസ്സൽ മലബാർ-കോഴിക്കോടൻ ബിരിയാണി തയ്യാറാക്കാൻ കൈമ അരി തന്നെ വേണമെന്നത് മലപ്പുറം ജില്ലയിലടക്കമുള്ള ഹോട്ടലുകാർക്ക് നിർബന്ധമാണ്.
കൈമയ്ക്ക് പകരം കോലം, ബസുമതി അരികൾ ഉപയോഗിച്ച് ബിരിയാണിയുടെ ചില വകഭേദങ്ങൾ തയ്യാറാക്കാൻ ചിലർ ശ്രമിച്ചെങ്കിലും, അതിനൊന്നും കൈമ അരി നൽകുന്ന തനത് മണവും രുചിയും ലഭിക്കുന്നില്ലെന്നാണ് ഉപഭോക്താക്കളുടെയും പാചകക്കാരുടെയും വിലയിരുത്തൽ.
കൈമ അരിയുടെ വില കുതിച്ചുയർന്നതോടെ പഴയ നിരക്കിൽ ബിരിയാണി വിൽക്കാൻ കഴിയാത്ത അവസ്ഥയിലേക്കാണ് ഹോട്ടലുകൾ നീങ്ങുന്നത്. രുചിയിൽ വിട്ടുവീഴ്ച ചെയ്യാതെ കൈമ അരി തന്നെ ഉപയോഗിക്കണമെങ്കിൽ ബിരിയാണിയുടെ വില കൂട്ടേണ്ടി വരുമെന്ന് വ്യാപാരികൾ വ്യക്തമാക്കുന്നു. ചുരുക്കത്തിൽ, കൈമ അരിയുടെ ക്ഷാമം മലബാറിന്റെ തനത് ബിരിയാണി പെരുമയ്ക്ക് തന്നെ മങ്ങലേൽപ്പിക്കുമോ എന്ന ആശങ്കയിലാണ് ഭക്ഷണപ്രേമികളും ഹോട്ടൽ വ്യവസായികളും
