വാഹനപ്രേമികൾക്ക് തിരിച്ചടി; കാറുകൾക്ക് വീണ്ടും വില കൂട്ടി മാരുതി സുസുക്കി

രാജ്യത്തെ ഏറ്റവും വലിയ കാർ നിർമ്മാതാക്കളായ മാരുതി സുസുക്കി തങ്ങളുടെ തിരഞ്ഞെടുത്ത മോഡലുകൾക്ക് വില വർദ്ധിപ്പിച്ചു. നവംബർ 22 ഞായറാഴ്ച മുതൽ പ്രാബല്യത്തിൽ വരുന്ന രീതിയിൽ ശരാശരി 0.31 ശതമാനം വിലവർദ്ധനവാണ് കമ്പനി പ്രഖ്യാപിച്ചിരിക്കുന്നത്. അസംസ്കൃത വസ്തുക്കളുടെ വിലവർദ്ധനവും ഉത്പാദനച്ചെലവിലുണ്ടായ തുടർച്ചയായ സമ്മർദ്ദവുമാണ് വില കൂട്ടാൻ നിർബന്ധിതരാക്കിയതെന്ന് സ്റ്റോക്ക് എക്സ്ചേഞ്ചുകൾക്ക് നൽകിയ അറിയിപ്പിൽ കമ്പനി വ്യക്തമാക്കി. ചെലവ് ചുരുക്കൽ നടപടികൾ തുടരുന്നുണ്ടെങ്കിലും, അധിക ഭാരത്തിന്റെ ഒരു ചെറിയ ഭാഗം ഉപഭോക്താക്കളിലേക്ക് കൈമാറുകയല്ലാതെ മറ്റ് മാർഗ്ഗമില്ലെന്ന് മാരുതി സുസുക്കി അറിയിച്ചു.

 

നടപ്പ് സാമ്പത്തിക വർഷത്തിൽ ഇത് നാലാം തവണയാണ് മാരുതി സുസുക്കി വാഹനങ്ങളുടെ വില ഉയർത്തുന്നത്. ഈ വർഷം ജൂൺ, ഓഗസ്റ്റ്, സെപ്റ്റംബർ മാസങ്ങളിലായി കമ്പനി മൂന്ന് തവണ വില വർദ്ധിപ്പിച്ചിരുന്നു. ഏതൊക്കെ മോഡലുകൾക്കും വേരിയന്റുകൾക്കുമാണ് നിലവിൽ വില വർദ്ധിച്ചിരിക്കുന്നതെന്ന കൃത്യമായ പട്ടിക കമ്പനി പുറത്തുവിട്ടിട്ടില്ല. വിൽപ്പനയുടെ അടിസ്ഥാനത്തിലുള്ള ശരാശരി വർദ്ധനവ് മാത്രമാണ് 0.31 ശതമാനമെന്നും, അതിനാൽ ഓരോ മോഡലുകളുടെയും വിലയിലുണ്ടാകുന്ന മാറ്റം വ്യത്യസ്തമായിരിക്കുമെന്നും റിപ്പോർട്ടുകൾ സൂചിപ്പിക്കുന്നു.

 

പശ്ചിമേഷ്യൻ സംഘർഷങ്ങളെത്തുടർന്നുണ്ടായ ചരക്കുനീക്ക പ്രതിസന്ധിയും ലോഹങ്ങളുടെ വിലക്കയറ്റവും കമ്പനിയുടെ ലാഭക്ഷമതയെ സാരമായി ബാധിച്ചിട്ടുണ്ട്. നടപ്പ് സാമ്പത്തിക വർഷത്തിന്റെ രണ്ടാം പാദത്തിൽ കമ്പനിയുടെ വിൽപ്പന റെക്കോർഡ് ഉയരത്തിലെത്തിയെങ്കിലും അറ്റാദായത്തിൽ ഏകദേശം 27 ശതമാനത്തിന്റെ ഇടിവാണ് രേഖപ്പെടുത്തിയത്. അസംസ്കൃത വസ്തുക്കളുടെ ചെലവ് 48 ശതമാനത്തോളം ഉയർന്നതാണ് ലാഭം കുറയാൻ കാരണമായത്. വരും മാസങ്ങളിലും വിപണി സാഹചര്യങ്ങൾ വിലയിരുത്തി വിലയിൽ മാറ്റങ്ങൾ വരുത്തുമെന്ന സൂചന കമ്പനി നേരത്തെ തന്നെ നൽകിയിരുന്നു.


Join our Whatsapp group for more Live News..
Click to join our Whatsapp group

Leave a Reply

Your email address will not be published. Required fields are marked *

error: Content is protected !!