ആനക്കാംപൊയിൽ: ആനക്കാംപൊയിൽ- കള്ളാടി തുരങ്കപാതയുമായി ബന്ധപ്പെട്ട ദുഷ്പ്രചാരണങ്ങൾക്കെതിരെ തുരങ്ക പാത സംരക്ഷണ സമിതി സർവകക്ഷി യോഗം ചേർന്നു. മലയോര മേഖലയിലെ വികസനത്തിന് നിർണായകമായ ഈ പദ്ധതി കേരളത്തിന്റെ ഭാവി ആവശ്യമായ സ്വപ്ന പദ്ധതിയാണെന്ന് ആനക്കാംപൊയിൽ സർവകക്ഷി യോഗം വിലയിരുത്തി. പദ്ധതിക്കെതിരായ പരിസ്ഥിതിവാദികളുടെ നിലപാടുകൾ പരിതാപകരമാണെന്നും, ഇത് മലയോര മേഖലയിലെ വികസന സാധ്യതകളെ ഇല്ലാതാക്കുകയാണെന്നും യോഗം അഭിപ്രായപ്പെട്ടു. ഈ നിലപാടുകൾക്കെതിരെ ശക്തമായ പ്രതിരോധ പ്രവർത്തനങ്ങൾ നടത്താനും പ്രാദേശിക ജനങ്ങളും സാംസ്കാരിക സംഘടനകളും തെരുവിലിറങ്ങാനും യോഗം തീരുമാനിച്ചു.
തിരുവമ്പാടി ഗ്രാമപഞ്ചായത്ത് ഒന്നാം വാർഡ് അംഗം മഞ്ജു ഷിബിൻ അധ്യക്ഷയായ യോഗം ജില്ലാ പഞ്ചായത്ത് അംഗം ബോസ് ജേക്കബ് ഉദ്ഘാടനം ചെയ്തു. തിരുവമ്പാടി ഗ്രാമപഞ്ചായത്ത് പ്രസിഡണ്ട് ബിന്ദു ജോൺസൺ ഉൾപ്പെടെ രാഷ്ട്രീയ നേതാക്കൾക്കൊപ്പം പൊതുസമൂഹത്തിന്റെയും സാംസ്കാരിക പ്രവർത്തകരുടെയും പങ്കാളിത്തം യോഗത്തിൽ ശ്രദ്ധേയമായി.
യോഗത്തിൽ 101 അംഗ സമര സമിതിയെയും തിരഞ്ഞെടുത്തു. തലവന്മാരായി തിരുവമ്പാടി ഗ്രാമപഞ്ചായത്ത് അംഗങ്ങൾ അടക്കം നിരവധി നേതാക്കളെ തിരഞ്ഞെടുത്തു. ഫിലിപ്പ് മാലിശ്ശേരിയിൽ, ടോമി കൊന്നക്കൽ, ബാബു കളത്തൂർ തുടങ്ങിയവരും അവരുടെ പിന്തുണയും സമരനിർദ്ദേശങ്ങളും പങ്കുവച്ചു.
