കേരളത്തിൽ വേനൽ ചൂട് അതിശക്തമായി തുടരുന്നതിനിടയിൽ സംസ്ഥാനത്തെ വൈദ്യുതി ഉപഭോഗം സർവ്വകാല റെക്കോർഡിലേക്ക്. ഇന്നലെ മാത്രം 112.16 ദശലക്ഷം യൂണിറ്റ് വൈദ്യുതിയാണ് സംസ്ഥാനത്ത് ഉപയോഗിച്ചത്. ഈ മാസത്തെ ഏറ്റവും ഉയർന്ന നിരക്കാണിത്. ഇന്നലെ വൈകുന്നേരത്തെ കണക്കുകൾ പ്രകാരം വൈദ്യുതി ആവശ്യകത 5933 മെഗാവാട്ടിലെത്തി. ചരിത്രത്തിലാദ്യമായാണ് വൈദ്യുതി ഉപഭോഗം ഇത്രയുമധികം ഉയരുന്നത്. ചൂട് കഠിനമായതോടെ എയർ കണ്ടീഷണറുകളുടെയും കൂളറുകളുടെയും ഉപയോഗം വർധിച്ചതാണ് ഉപഭോഗം കുതിച്ചുയരാൻ കാരണമായത്.
