കൊച്ചി: സംസ്ഥാനത്ത് സ്വർണ്ണവിലയിൽ വീണ്ടും വർദ്ധനവ്. പവന് ഇന്ന് 160 രൂപയാണ് വർദ്ധിച്ചത്. ഇതോടെ ഒരു പവൻ സ്വർണ്ണത്തിന്റെ വില 1,14,080 രൂപയായി ഉയർന്നു (Kerala Gold Price). ഗ്രാമിന് 20 രൂപയാണ് വർദ്ധിച്ചത്; 14,260 രൂപയാണ് ഒരു ഗ്രാം സ്വർണ്ണത്തിന്റെ ഇന്നത്തെ വില. കഴിഞ്ഞ കുറച്ചു ദിവസങ്ങളായി സ്വർണ്ണവിലയിൽ പ്രകടമായ മാറ്റങ്ങളാണ് ഉണ്ടായിക്കൊണ്ടിരിക്കുന്നത്.
പശ്ചിമേഷ്യൻ സംഘർഷങ്ങളിൽ അയവ് വരുമെന്ന പ്രതീക്ഷയിൽ അമേരിക്കയും ഇറാനും തമ്മിലുള്ള സമാധാന ചർച്ചകൾ പുനരാരംഭിക്കുമെന്ന റിപ്പോർട്ടുകളാണ് വിപണിയെ സ്വാധീനിച്ചത്. ചർച്ചകളെക്കുറിച്ചുള്ള വാർത്തകൾ വന്നതോടെ അന്താരാഷ്ട്ര വിപണിയിൽ എണ്ണവില കുറഞ്ഞിരുന്നു. ഇതിന് പിന്നാലെയാണ് സ്വർണ്ണവിലയിൽ വർദ്ധനവ് രേഖപ്പെടുത്തിയത്. പശ്ചിമേഷ്യയിലെ ഓരോ രാഷ്ട്രീയ മാറ്റങ്ങളും ആഗോള വിപണിയിൽ സ്വർണ്ണവിലയെ നേരിട്ട് ബാധിക്കുന്നുണ്ട്.
സ്വർണ്ണവിലയിലെ സർവ്വകാല റെക്കോർഡ് ഈ വർഷം ജനുവരി 29-ന് രേഖപ്പെടുത്തിയ 1,31,160 രൂപയാണ്. കഴിഞ്ഞ ഡിസംബർ 23-നാണ് ചരിത്രത്തിലാദ്യമായി സ്വർണ്ണവില പവന് ഒരു ലക്ഷം രൂപ കടന്നത്. വിപണിയിലെ അനിശ്ചിതത്വം തുടരുന്നതിനാൽ വരും ദിവസങ്ങളിലും വിലയിൽ മാറ്റങ്ങൾ ഉണ്ടായേക്കാം.
