മലപ്പുറം : സംസ്ഥാനത്തെ പൊതുഗതാഗത രംഗത്ത് മലബാർ മേഖലയോട് കാണിക്കുന്ന കടുത്ത വിവേചനത്തിനും അവഗണനയ്ക്കുമെതിരെ വലിയ തോതിലുള്ള ജനരോഷവും പ്രതിഷേധവുമാണ് ഉയർന്നുവരുന്നത്. കേരളത്തിലെ ആകെ ജനസംഖ്യയുടെ 54 ശതമാനവും വടക്കൻ ജില്ലകളിലാണെങ്കിലും സംസ്ഥാനത്തെ ആകെയുള്ള കെ.എസ്.ആർ.ടി.സി സർവീസുകളുടെ വെറും 33 ശതമാനം മാത്രമാണ് മലബാർ മേഖലയ്ക്ക് നിലവിൽ ലഭിക്കുന്നത്. തെക്കൻ കേരളത്തിൽ 56 കെ.എസ്.ആർ.ടി.സി ഡിപ്പോകൾ സജീവമായി സർവീസ് നടത്തുമ്പോൾ ജനസാന്ദ്രതയേറിയ മലബാറിലാകെ വെറും 13 ഡിപ്പോകൾ മാത്രമാണ് അനുവദിച്ചിട്ടുള്ളത്.
ഈ വലിയ വിടവ് വടക്കൻ ജില്ലകളുടെ സമഗ്രമായ വികസന മുരടിപ്പിന് കാരണമാകുന്നതോടൊപ്പം സാധാരണക്കാരായ യാത്രാക്കാരുടെ ദൈനംദിന ജീവിതത്തെയും കടുത്ത ദുരിതത്തിലാഴ്ത്തുന്നു. കെ.എസ്.ആർ.ടി.സി ഡിപ്പോകളുടെയും ബസുകളുടെയും ഈ കടുത്ത കുറവ് മൂലം സർക്കാർ പ്രഖ്യാപിച്ച സ്ത്രീകളുടെ സൗജന്യ യാത്രാ പദ്ധതി പോലും മലബാറിലെ സ്ത്രീകൾക്ക് തുല്യമായി പ്രയോജനപ്പെടുത്താൻ സാധിക്കാത്ത അവസ്ഥയാണുള്ളത്.
കഴിഞ്ഞ ജൂൺ നാലിന് നിയമസഭയിൽ തൃത്താല എം.എ.എൽ.എ വി.ടി. ബൽറാം മലബാർ മേഖലയിലെ പൊതുഗതാഗത സൗകര്യങ്ങളുടെ ഈ അപര്യാപ്തതയെക്കുറിച്ച് അടിയന്തര ശ്രദ്ധ ക്ഷണിച്ചിരുന്നു. വടക്കൻ ജില്ലകളിൽ കെ.എസ്.ആർ.ടി.സി സർവീസുകളുടെ കുറവുണ്ടെന്ന കാര്യം ഗൗരവത്തോടെ കാണുന്നുവെന്നും മഞ്ചേശ്വരം പോലുള്ള സ്ഥലങ്ങളിലെ യാത്രാദുരിതം പരിഹരിക്കാൻ മുൻഗണന നൽകുമെന്നും ഗതാഗത വകുപ്പ് മന്ത്രി സി.പി. ജോൺ ഇതിന് നിയമസഭയിൽ മറുപടി നൽകുകയുണ്ടായി. കൂടാതെ കെ.എസ്.ആർ.ടി.സിയുടെ സാമ്പത്തിക സ്ഥിതി മെച്ചപ്പെടുന്ന മുറയ്ക്ക് കൂടുതൽ സർവീസുകൾ ആരംഭിക്കുമെന്നും തൃത്താലയിൽ ഡിപ്പോ അനുവദിക്കുന്ന കാര്യം പരിശോധിക്കുമെന്നും മന്ത്രി ഉറപ്പുനൽകിയിട്ടുണ്ട്.
മലബാറിലെ പ്രധാന വാണിജ്യ കേന്ദ്രങ്ങളിലൊന്നായ അരീക്കോട് പട്ടണത്തിലും കെ.എസ്.ആർ.ടി.സി ഡിപ്പോയുടെ അഭാവം വലിയ യാത്രാക്ലേശമാണ് സൃഷ്ടിക്കുന്നത്. ഇവിടെ രാത്രി 8 മണി കഴിഞ്ഞാൽ ദീർഘദൂര സർവീസുകൾ ഇല്ലാത്തതിനാൽ ചികിത്സയ്ക്കും വിദ്യാഭ്യാസത്തിനുമായി കോഴിക്കോട്, മഞ്ചേരി ഭാഗങ്ങളിലേക്ക് പോകുന്ന നൂറുകണക്കിന് യാത്രക്കാർ വലിയ തുക നൽകി സ്വകാര്യ വാഹനങ്ങളെ ആശ്രയിക്കേണ്ട ദുരവസ്ഥയിലാണ്.
നിലവിൽ അരീക്കോട് സബ് ഡിപ്പോ സ്ഥാപിക്കുന്നതിനാവശ്യമായ ഭൂമി ലഭ്യമായിട്ടും പദ്ധതി കടലാസിലൊതുങ്ങുന്നതിനെതിരെ വലിയ ജനപ്രതിഷേധമുണ്ട്. ഈ സാഹചര്യത്തിൽ ഏറനാട് മണ്ഡലം പ്രതിനിധിയും നിലവിലെ പൊതുമരാമത്ത് വകുപ്പ് മന്ത്രിയുമായ പി.കെ. ബഷീർ അടിയന്തരമായി വിഷയത്തിൽ ഇടപെട്ട് കെ.എസ്.ആർ.ടി.സി ഡിപ്പോ ഉൾപ്പെടെയുള്ള അരീക്കോടിന്റെ അടിസ്ഥാന സൗകര്യ വികസനങ്ങൾ ഭരണതലത്തിൽ വേഗത്തിൽ നടപ്പിലാക്കണമെന്നാണ് നാട്ടുകാർ ആവശ്യപ്പെടുന്നത്.
