ട്ഇന്ത്യയുടെ കരുത്തുറ്റ സാമ്പത്തിക വളർച്ചയ്ക്കും ധനകാര്യ മേഖലയിലെ സ്ഥിരതയ്ക്കും അന്താരാഷ്ട്ര തലത്തിൽ വീണ്ടും വലിയ അംഗീകാരം. മുൻനിര റേറ്റിംഗ് ഏജൻസിയായ ജപ്പാൻ ക്രെഡിറ്റ് റേറ്റിംഗ് ഏജൻസി (JCRA) ഇന്ത്യയുടെ സോവറിൻ ക്രെഡിറ്റ് റേറ്റിംഗ് ‘BBB+’ൽ നിന്ന് ‘A-‘ലേക്ക് ഉയർത്തി. ഉയർന്ന സാമ്പത്തിക വളർച്ചാ നിരക്ക്, ആഭ്യന്തര ഉപഭോഗത്തിലെ കുതിപ്പ്, പൊതു നിക്ഷേപങ്ങളിലെ വർദ്ധനവ്, ധനകാര്യ മേഖലയിലെ നിർണ്ണായക മുന്നേറ്റങ്ങൾ എന്നിവ കണക്കിലെടുത്താണ് ഈ സുപ്രധാന റേറ്റിംഗ് അപ്ഗ്രേഡ്.
ആഭ്യന്തര ഉപഭോഗത്തിന്റെയും അടിസ്ഥാന സൗകര്യ വികസനത്തിന്റെയും കരുത്തിൽ ഇന്ത്യൻ സമ്പദ്വ്യവസ്ഥ ശരാശരി ഏഴ് ശതമാനം വളർച്ചാ നിരക്ക് നിലനിർത്തുന്നുണ്ടെന്നും, വരും സാമ്പത്തിക വർഷത്തിലും ആറ് ശതമാനത്തിന് മുകളിലുള്ള വളർച്ച തുടരുമെന്നും ഏജൻസി വ്യക്തമാക്കി. ജി.എസ്.ടിയുടെ കൃത്യമായ നടത്തിപ്പും ഡിജിറ്റൽ പബ്ലിക് ഇൻഫ്രാസ്ട്രക്ചറിന്റെ വികസനവും ഉൽപ്പാദനക്ഷമത വർദ്ധിപ്പിച്ചതിലൂടെ രാജ്യത്തിന്റെ സാമ്പത്തിക അടിത്തറ ശക്തമായതായും നിരീക്ഷിക്കപ്പെട്ടു.
രാജ്യത്തെ ബാങ്കിംഗ് മേഖല കൈവരിച്ച അവിശ്വസനീയമായ നേട്ടങ്ങളെയും റിപ്പോർട്ട് പ്രത്യേകം എടുത്തുപറയുന്നുണ്ട്. നിഷ്ക്രിയ ആസ്തികൾ (NPA) 1.8 ശതമാനത്തിലേക്ക് കുത്തനെ താഴ്ന്നത് ബാങ്കിംഗ് സംവിധാനത്തിന്റെ സുരക്ഷിതത്വവും കരുത്തും വർദ്ധിപ്പിച്ചു. റിസർവ് ബാങ്കിന്റെ കർശനമായ മേൽനോട്ടവും ബാങ്കിംഗ് ചട്ടക്കൂടുകളുടെ കാര്യക്ഷമതയുമാണ് ഈ പുരോഗതിക്ക് വഴിയൊരുക്കിയത്.
അതേസമയം, മോശം കാലാവസ്ഥയും പശ്ചിമേഷ്യൻ സംഘർഷങ്ങളും കാരണം ഭക്ഷ്യ-ഊർജ്ജ മേഖലകളിൽ വിലക്കയറ്റ ഭീഷണി നിലനിൽക്കുന്നുണ്ടെങ്കിലും പണപ്പെരുപ്പം റിസർവ് ബാങ്കിന്റെ നിയന്ത്രണ പരിധിക്കുള്ളിൽ തന്നെയാണെന്ന് ഏജൻസി ചൂണ്ടിക്കാട്ടി. കേന്ദ്ര സർക്കാരിന്റെ കടബാധ്യതകൾ ക്രമേണ കുറയുന്നുണ്ടെങ്കിലും സംസ്ഥാനങ്ങളുടെ വായ്പകൾ ഉൾപ്പെടുന്ന മൊത്തത്തിലുള്ള കടവും പലിശ ബാധ്യതയും ഇനിയും ശ്രദ്ധിക്കേണ്ടതുണ്ടെന്ന നിരീക്ഷണവും റിപ്പോർട്ടിൽ വ്യക്തമാക്കുന്നുണ്ട്. ആഗോള പ്രതിസന്ധികൾക്കിടയിലും ഇന്ത്യ കൈവരിക്കുന്ന സാമ്പത്തിക മുന്നേറ്റത്തിന്റെ വ്യക്തമായ തെളിവാണ് റേറ്റിംഗിലെ ഈ ഉന്നതി.
