തിരുവനന്തപുരം: തലസ്ഥാനത്ത് മദ്രസയിൽ പഠിക്കാനെത്തിയ പത്തു വയസ്സുകാരായ രണ്ട് ആൺകുട്ടികളെ പ്രകൃതിവിരുദ്ധ പീഡനത്തിന് ഇരയാക്കിയ കേസിൽ മദ്രസ അധ്യാപകൻ അറസ്റ്റിൽ. കൊല്ലം സ്വദേശിയും വേളി മാധവപുരത്തെ മദ്രസയിലെ അധ്യാപകനുമായ എൻ. ഇസ്മായിൽ (58) ആണ് വലിയതുറ പൊലീസിന്റെ പിടിയിലായത്.
ഓഗസ്റ്റ് 24-നാണ് കേസിനാസ്പദമായ സംഭവം നടന്നത്. മദ്രസയിൽ മതപഠനത്തിനായി എത്തിയ കുട്ടികളെ അധ്യാപകൻ ക്രൂരമായ അതിക്രമത്തിന് ഇരയാക്കുകയായിരുന്നു. വീട്ടിലെത്തിയ കുട്ടികൾ ഭയത്തോടെ വിവരങ്ങൾ രക്ഷിതാക്കളോട് വെളിപ്പെടുത്തിയതോടെയാണ് നാടിനെ നടുക്കിയ ക്രൂരത പുറത്തറിഞ്ഞത്. തുടർന്ന് രക്ഷിതാക്കൾ ഉടൻ തന്നെ വലിയതുറ പൊലീസിൽ പരാതി നൽകുകയും, പോക്സോ (POCSO) അടക്കമുള്ള വകുപ്പുകൾ ചുമത്തി പൊലീസ് ഇയാളെ കസ്റ്റഡിയിലെടുത്ത് അറസ്റ്റ് രേഖപ്പെടുത്തുകയുമായിരുന്നു.
