കൽപ്പറ്റ: ജാമ്യവ്യവസ്ഥ ലംഘിച്ച് വീണ്ടും കുറ്റകൃത്യങ്ങളിൽ ഏർപ്പെടുന്നവരെ പൂട്ടാനൊരുങ്ങി വയനാട് പോലീസ്. ജാമ്യം നേടി പുറത്തിറങ്ങി നിരന്തര കുറ്റകൃത്യങ്ങൾ ചെയ്യുന്നവരുടെ ജാമ്യം റദ്ദ് ചെയ്യുന്നതിനുള്ള റിപ്പോർട്ടുകൾ കോടതിയിൽ സമർപ്പിച്ചു. ബത്തേരി സ്റ്റേഷൻ പരിധിയിൽ വിവിധ ക്രിമിനൽ കേസുകളിൽപെട്ട ദൊട്ടപ്പൻകുളം പുൽപറക്കൽ വീട്ടിൽ പി.യു ജോസഫ് (51) എന്ന സീസിങ് ജോസിൻ്റെയും, മലപ്പുറം മുണ്ടക്കര വീട്ടിൽ സുധക്കത്തുള്ള എന്ന ഷൗക്കത്ത് (44)ൻ്റെയും ജാമ്യം റദ്ദ് ചെയ്തുകൊണ്ടുള്ള ഉത്തരവിറങ്ങി. ജോസഫ് നിലവിൽ ഒറീസ്സയിലെ കൊട്ടിയയിൽ ജയിൽ വാസം അനുഭവിച്ചു വരികയാണ്. ഷൗക്കത്ത് ആന്ധ്രപ്രദേശിലെ ജയിലിൽ നിന്നും ജാമ്യമെടുത്ത് പുറത്തിറങ്ങിയ ആളാണ്.
