കൊച്ചി : പോണ്ടിച്ചേരിയും ഗോവയും കേന്ദ്രമായുള്ള ചന്ദനത്തൈല ഫാക്ടറികളിലേക്ക് ചന്ദനമുട്ടികള്‍ കടത്തുന്ന സംഘത്തെ വനംവകുപ്പ് അറസ്റ്റ് ചെയ്തു.വനംവകുപ്പ് ഉദ്യോഗസ്ഥർ ഇടനിലക്കാരെന്ന വ്യാജേന സമീപിച്ചാണ് പ്രതികളെ വലയില്‍ വീഴ്‌ത്തിയത്. സംഘത്തില്‍ നിന്ന് മേല്‍ത്തരം ഇനത്തില്‍പ്പെട്ട 66 കിലോ ചന്ദനമുട്ടികളും ഇവ കടത്താനുപയോഗിച്ച രണ്ട് വാഹനങ്ങളും പിടിച്ചെടുത്തു. പ്രതികളില്‍ ഒരാള്‍ പാസ്റ്ററാണ്.
ഇടുക്കി ഇരട്ടയാർ പാലമറ്റത്തില്‍ വീട്ടില്‍ ചാർലി ജോസഫ് (56), ഇരട്ടയാർ ഈറ്റിക്കല്‍ വീട്ടില്‍ നിഖില്‍ സുരേഷ് (25), കട്ടപ്പന വെള്ളായംകുടി വാഴപ്പറമ്പില്‍ വീട്ടില്‍ സരണ്‍ ശശി 26), രാജാക്കാട് വഴേപ്പറമ്പില്‍ വീട്ടില്‍ പാസ്റ്റർ വി.എസ്.ഷാജി (58), തൊടുപുഴ കുടയത്തൂർ വളവനാട്ടു വീട്ടില്‍ അനീഷ് മാത്യു (43) എന്നിവരെയാണ് കോടനാട് റേഞ്ച് ഫോറസ്റ്റ് ഓഫീസർ ആർ. അധീഷ്, മേക്കപ്പാല ഫോറസ്റ്റ് ഡെപ്യൂട്ടി റേഞ്ച് ഓഫീസർ കെ. ദിധീഷ് എന്നിവരുടെ നേതൃത്വത്തില്‍ പിടികൂടിയത്.
മൂവാറ്റുപ്പുഴ തൃക്കളത്തൂർ ഭാഗത്ത് നിന്ന് അനീഷിനെ ആദ്യം കസ്റ്റഡിയിലെടുത്തു. തുടർന്ന് വാഴക്കുളത്ത് നിന്ന് പാസ്റ്റർ ഷാജി പിടിയിലായി. രണ്ട് കിലോ ചന്ദനമുട്ടി കണ്ടെടുത്തു. ഇരുവരില്‍ നിന്നും കിട്ടിയ വിവരത്തെ തുടർന്നാണ് ഇരട്ടയാറില്‍ നിന്ന് 64 കിലോ ചന്ദനമുട്ടിയുമായി ചാർലി ജോസഫ്, സുരേഷ്, സരണ്‍ ശശി എന്നിവർ അറസ്റ്റിലായത്. നിഖിലിന്റെ വാഗണർ കാറുള്‍പ്പെടെ കസ്റ്റഡിയിലെടുത്തു.
വടയാർ, പൂപ്പാറ മേഖലകളില്‍ നിന്നാണ് പ്രതികള്‍ ചന്ദനം ശേഖരിക്കുന്നത്. കിലോയ്ക്ക് 20000 രൂപയാണ് ഈടാക്കുന്നത്. ഷാജി വിസ തട്ടിപ്പ്, ഹെറോയിൻ വില്‍പ്പന കേസുകളില്‍ പ്രതിയാണ്. പെരുമ്പാവൂർ മജിസ്ട്രേറ്റ് കോടതിയില്‍ ഹാജരാക്കി 14 ദിവസത്തേക്ക് മൂവാറ്റുപുഴ സബ് ജയിലില്‍ റിമാൻഡ് ചെയ്ത പ്രതികളെ കസ്റ്റഡിയില്‍ വാങ്ങി ചോദ്യം ചെയ്യാൻ കോടതിയെ സമീപിക്കുമെന്ന് വനംവകുപ്പ് അറിയിച്ചു.
