പുൽപ്പള്ളി: ചേകാടി വനപാതയിൽ സ്‌കൂൾ ബസിനുനേരെ തിരിഞ്ഞുവന്ന കാട്ടാനക്കൂട്ടം വിദ്യാർഥികളെ ഭീതിയിലാഴ്ത്തി. വെള്ളിയാഴ്ച രാവിലെ 9 മണിക്ക് പാക്കം-പന്നിക്കൽ-ചേകാടി റൂട്ടിലാണ് വേലിയമ്പം ദേവിവിലാസം വൊക്കേഷനൽ ഹയർസെക്കൻഡറി സ്‌കൂൾ ബസ് കാട്ടാനക്കൂട്ടത്തിനു മുമ്പിൽപെട്ടത്. കൂട്ടത്തിലെ കുട്ടിയാന ബസിനു നേരെ ഓടിവന്നതോടെ മറ്റാനകളും ഒപ്പമെത്തി. ഒരുപിടിയാന ബസിനു നേരെ വന്നപ്പോൾ ഡ്രൈവർ കൈനിക്കുടി ബേബി ധൈര്യസമേതം ബസ് മുന്നോട്ടെടുത്ത് ആനയെ മറികടന്നു. റോഡിനിരുഭാഗവും ബൈക്കുകളും സ്വകാര്യവാഹനങ്ങളും ആനക്കൂട്ടം വഴിതടഞ്ഞതിനാൽ കുറെനേരം കുടുങ്ങിക്കിടന്നു. ഈ റൂട്ടിൽ പകൽസമയങ്ങളിൽ പോലും വാഹനങ്ങൾ ആനയുടെ മുൻപിൽ പെടാറുണ്ട്.
