മുണ്ടക്കൈ ചൂരല്‍മല ഉരുള്‍പൊട്ടല്‍ ദുരന്തത്തില്‍ താല്‍ക്കാലിക പുനരധിവാസ ക്യാമ്പുകളില്‍ കഴിയുന്നവര്‍ക്കായി ഓണക്കിറ്റുകള്‍ വിതരണം തുടങ്ങി. ജില്ലാ ഭരണകൂടത്തിന്റെ നേതൃത്വത്തിലാണ് 18 ഇനങ്ങള്‍ അടങ്ങിയ ഓണക്കിറ്റുകള്‍ തയ്യാറാക്കിയത്. തുണികിറ്റും സോപ്പ് പേസ്റ്റ് തുടങ്ങിയവ അടങ്ങിയ ഹൈജിന്‍ കിറ്റുകളും ഇതോടൊപ്പം ദുരന്തബാധിതര്‍ക്ക് നല്‍കും. ഇതുകൂടാതെ അരിയും ലഭ്യമാക്കുന്നുണ്ട്. 250 കിറ്റുകള്‍ ഇതിനകം ദുരന്തബാധിതര്‍ താമസിക്കുന്ന തദ്ദേശ സ്ഥാപനങ്ങളില്‍ എത്തിച്ചുനല്‍കി. ഇവിടെ നിന്നാണ് കിറ്റുകള്‍ താല്‍ക്കാലികമായി പുനരധിവസിപ്പിച്ചവര്‍ക്കായി എത്തിക്കുക. മേപ്പാടി ഗ്രാമപഞ്ചായത്ത് പരിധിയില്‍ താല്‍ക്കാലികമായി പുനരധിവസിക്കപ്പെട്ട കുടുംബങ്ങള്‍ക്ക് വെളളിയാഴ്ച രാവിലെ 10 മുതല്‍ പഴയ പഞ്ചായത്ത് കോണ്‍ഫറന്‍സ് ഹാളില്‍ ഓണക്കിറ്റ് വിതരണം നടക്കും.
