സ്വകാര്യ ബസ് ഉടമകളുടെ വിവിധ ആവശ്യങ്ങളിൽ സർക്കാരിൽനിന്ന് അനുകൂല ഉറപ്പ് ലഭിച്ചതോടെ ബസ് ഓപ്പറേറ്റേഴ്സ് ഫെഡറേഷൻ നടത്തിവന്ന നിരാഹാര സമരം അവസാനിപ്പിച്ചു. ഗതാഗത മന്ത്രി സി.പി. ജോണുമായി നടത്തിയ ചർച്ചയിലാണ് സ്വകാര്യ ബസ് മേഖലയുമായി ബന്ധപ്പെട്ട പ്രധാന വിഷയങ്ങളിൽ ധാരണയായത്. സ്വകാര്യ ബസുകൾ കെഎസ്ആർടിസി വെറ്റ് ലീസ് വ്യവസ്ഥയിൽ വാടകയ്ക്കെടുക്കുമെന്ന മന്ത്രിയുടെ ഉറപ്പാണ് സമരം അവസാനിപ്പിക്കുന്നതിൽ നിർണായകമായത്.
പുതിയ ക്രമീകരണമനുസരിച്ച് സ്വകാര്യ ബസുകൾ കെഎസ്ആർടിസി വാടകയ്ക്കെടുത്ത് സർവീസ് നടത്തും. ബസിന്റെ ഡ്രൈവറെ സ്വകാര്യ ബസ് ഉടമ നൽകുമ്പോൾ കണ്ടക്ടറെ കെഎസ്ആർടിസിയായിരിക്കും നിയോഗിക്കുക. ഇതുസംബന്ധിച്ച ഉറപ്പ് ചർച്ചയിൽ മന്ത്രി സംഘടനാ പ്രതിനിധികൾക്ക് നൽകി.
സ്വകാര്യ ബസുകളുടെ സർവീസ് കാലപരിധി വർധിപ്പിക്കണമെന്ന ആവശ്യത്തിലും ചർച്ചയിൽ അനുകൂല നിലപാടുണ്ടായി. ഇതുമായി ബന്ധപ്പെട്ട പത്മകുമാർ കമ്മിഷന്റെ ശുപാർശകൾ നിയമാനുസൃതമായി നടപ്പാക്കുമെന്ന് മന്ത്രി അറിയിച്ചു. ഒരു ബസ് ഉടമയ്ക്ക് തന്റെ സർവീസ് മറ്റൊരാൾക്ക് നിയമപരമായി കൈമാറുന്നതിന് നിലവിലുള്ള സാങ്കേതിക തടസങ്ങൾ നീക്കാനും യോഗത്തിൽ ധാരണയായി.
സ്വകാര്യ ബസ് ഉടമകളും സർക്കാരും തമ്മിലുള്ള ആശയവിനിമയം കൂടുതൽ കാര്യക്ഷമമാക്കുന്നതിനായി സ്ഥിരംസമിതി രൂപീകരിക്കാനും തീരുമാനിച്ചിട്ടുണ്ട്. ബസ് ഉടമകൾ നേരിടുന്ന പ്രശ്നങ്ങൾ ചർച്ച ചെയ്യുന്നതിനും അവയ്ക്ക് പരിഹാരം കണ്ടെത്തുന്നതിനുമായി പ്രവർത്തിക്കുന്ന സമിതിയിൽ സംഘടനാ പ്രതിനിധികളെയും ഉൾപ്പെടുത്തുമെന്ന് മന്ത്രി വ്യക്തമാക്കി
