ന്യൂഡൽഹി: രാജ്യത്ത് സാധാരണക്കാർക്കും ഹോട്ടൽ വ്യവസായികൾക്കും കനത്ത പ്രഹരമേകി പാചകവാതക വില വീണ്ടും വർദ്ധിപ്പിച്ചു . പൊതുമേഖലാ എണ്ണക്കമ്പനികളാണ് വാണിജ്യ ആവശ്യങ്ങൾക്കുള്ള പാചകവാതക സിലിണ്ടറുകളുടെ വില വർദ്ധിപ്പിച്ചത്. അതേസമയം, സാധാരണക്കാരായ വീട്ടമ്മമാർ ഉപയോഗിക്കുന്ന ഗാർഹിക ആവശ്യങ്ങൾക്കുള്ള സിലിണ്ടർ വിലയിൽ ഇത്തവണ മാറ്റമൊന്നും വരുത്തിയിട്ടില്ല. വാണിജ്യ സിലിണ്ടറിന് ഒറ്റയടിക്ക് 46 രൂപയാണ് ഇന്ന് വർദ്ധിപ്പിച്ചത്. ഇതോടെ പുതിയ പുതുക്കിയ നിരക്ക് സിലിണ്ടറിന് 3131 രൂപയായി ഉയർന്നു.
എല്ലാ മാസവും ഒന്നാം തീയതി രാജ്യത്തെ പൊതുമേഖലാ എണ്ണക്കമ്പനികൾ പാചകവാതക നിരക്കുകൾ അന്താരാഷ്ട്ര വിപണിക്ക് അനുസൃതമായി പുനർനിശ്ചയിക്കാറുണ്ട്. ജൂൺ ഒന്നായ ഇന്നും പതിവുപോലെ നടത്തിയ അവലോകനത്തിലാണ് വാണിജ്യ സിലിണ്ടറുകളുടെ വില കുത്തനെ കൂട്ടാൻ തീരുമാനിച്ചത്. ആഗോള വിപണിയിൽ ക്രൂഡ് ഓയിൽ വിലയിലുണ്ടായ തുടർച്ചയായ വർദ്ധനവും, മിഡിൽ ഈസ്റ്റിലെ തന്ത്രപ്രധാനമായ ഹോർമൂസ് കടലിടുക്കിലെ രാഷ്ട്രീയ-സൈനിക അസ്ഥിരതയും ഷിപ്പിംഗ് ചാർജ് വർദ്ധനവുമാണ് വിപണിയിൽ ഇത്തരമൊരു വിലക്കയറ്റത്തിന് പെട്ടെന്ന് കാരണമായതെന്ന് എണ്ണക്കമ്പനി വൃത്തങ്ങൾ വ്യക്തമാക്കി.
സംസ്ഥാനത്ത് ഇന്ന് മുതൽ മിൽമ പാലിനും തൈരിനും വില വർദ്ധിച്ചതിന് തൊട്ടുപിന്നാലെ വാണിജ്യ പാചകവാതകത്തിന് കൂടി വില ഉയർന്നത് ചെറുകിട കച്ചവടക്കാർക്കും വലിയ ഹോട്ടൽ ഉടമകൾക്കും കനത്ത ആഘാതമാകും. നിർമ്മാണച്ചെലവ് കുത്തനെ ഉയർന്നതോടെ വരും ദിവസങ്ങളിൽ സംസ്ഥാനത്തെ ഹോട്ടൽ ഭക്ഷണ സാധനങ്ങളുടെ വില വീണ്ടും വർദ്ധിപ്പിക്കാൻ തങ്ങൾ നിർബന്ധിതരാകുമെന്ന് ഹോട്ടൽ വ്യവസായ രംഗത്തുള്ളവർ ആശങ്ക പ്രകടിപ്പിച്ചു.
