മസിനഗുഡി: വളര്ത്തുനായയെ ഓടിക്കുന്നതിനിടെ ജനവാസമേഖലയിലെ വീട്ടിനുള്ളിലേക്ക് പുലി ഓടിക്കയറിയത് പ്രദേശവാസികളെ ഭീതിയിലാഴ്ത്തി.മുതുമല കടുവ സങ്കേതത്തിന് കീഴിലുള്ള മസിനഗുഡി റേഞ്ചിലെ സെല്വപ്പാ കോളനിയിലാണ് സംഭവം. ഇവിടെയുള്ള ശിവകുമാര് എന്നയാളുടെ വീട്ടിലേക്കാണ് രാത്രി ഒമ്പതരയോടെ പുലി അപ്രതീക്ഷിതമായി പാഞ്ഞെത്തിയത്.
നായക്ക് പിന്നാലെ വീടിനകത്തേക്ക് പുലി കയറിയതോടെ, അകത്തുണ്ടായിരുന്ന വീട്ടുകാര് അതിവേഗം പുറത്തേക്ക് ഓടി രക്ഷപ്പെടുകയായിരുന്നു. തുടര്ന്ന് ഇവർ പുറത്തുനിന്ന് വീട് പൂട്ടി വനംവകുപ്പിനെ വിവരമറിയിച്ചു. ഇതിനിടെ ജനലിലൂടെ പുലിയെ കാണാന് ശ്രമിച്ച നാട്ടുകാര്ക്ക് നേരെ അത് അക്രമാസക്തമായി ഗര്ജിച്ചുകൊണ്ട് കുതിച്ചുചാടാനും ശ്രമിച്ചു.
വിവരമറിഞ്ഞ് വനം റേഞ്ച് ഓഫിസറുടെ നേതൃത്വത്തിലുള്ള സംഘം ഉടനടി സ്ഥലത്തെത്തി. തുടര്ന്ന് മുതുമല ഫീൽഡ് ഡയറക്ടറുടെ മേല്നോട്ടത്തില് പുലര്ച്ചെ 2.30ഓടെ പുലിയെ കൂട്ടിലാക്കി പിടികൂടുകയായിരുന്നു. പിന്നീട് പുലിയെ സീഗൂര് വനമേഖലയിൽ സുരക്ഷിതമായി തുറന്നുവിട്ടതായും അധികൃതർ അറിയിച്ചു.
