ക്യാപ്ടൻ ശ്രേയസ് അയ്യരുടെ വെടിക്കെട്ട് സെഞ്ച്വറിയുടെ മികവില്‍ വെസ്റ്റ് ഇൻഡീസിനെതിരായ ആദ്യ ട്വന്റി20-യില്‍ ഇന്ത്യയ്ക്ക് എട്ട് വിക്കറ്റ് ജയം.വെസ്റ്റ് ഇൻഡീസ് ഉയർത്തിയ 172 റണ്‍സ് വിജയലക്ഷ്യം ഇന്ത്യ 14.4 ഓവറില്‍ രണ്ട് വിക്കറ്റ് നഷ്ടത്തില്‍ മറികടന്നു. 43 പന്തില്‍ പുറത്താകാതെ 102 റണ്‍സെടുത്ത അയ്യരാണ് ഇന്ത്യയുടെ വിജയശില്‍പി. ഇഷാൻ കിഷനും അയ്യരും ചേർന്നുള്ള മികച്ച കൂട്ടുകെട്ടാണ് ഇന്ത്യയെ അനായാസ വിജയത്തലേക്ക് നയിച്ചത്. ടോസ് നേടി ആദ്യം ബാറ്റിംഗിനിറങ്ങിയ വെസ്റ്റ് ഇൻഡീസിനെ ഇന്ത്യൻ ബൗളർമാർ 19.1 ഓവറില്‍ 171 റണ്‍സിന് പുറത്താക്കി.
ക്യാപ്ടൻ ഷായ് ഹോപ്പും ഷെർഫെയ്ൻ റൂതർഫോർഡും അർദ്ധസെഞ്ച്വറി നേടി. എന്നാല്‍ മറ്റുള്ള ബാറ്റർമാർക്ക് കാര്യമായ പിന്തുണ നല്‍കാനാകാതെ പോയതാണ് വിൻഡീസിന് തിരിച്ചടിയായത്. ഇന്ത്യയ്ക്കായി ട്വന്റി-20യില്‍ അരങ്ങേറ്റ മത്സരം കുറിച്ച നമൻ ധീർ മികച്ച പ്രകടനം പുറത്തെടുത്തു. മൂന്ന് വിക്കറ്റാണ് താരം വീഴ്ത്തിയത്. ഇന്ത്യൻ ബൗളർമാരുടെ മികച്ച പ്രകടനമാണ് വെസ്റ്റ് ഇൻഡീസിനെ വലിയ സ്‌കോറില്‍ നിന്ന് തടഞ്ഞത്.
172 റണ്‍സ് പിന്തുടർന്ന ഇന്ത്യയ്ക്ക് തുടക്കത്തില്‍ തന്നെ മലയാളി താരം സഞ്ജു സാംസണെയും അഭിഷേക് ശർമയെയും നഷ്ടമായി. 10 പന്തില്‍ 21 റണ്‍സാണ് അഭിഷേക് കൂട്ടിച്ചേർത്തത്. വീണ്ടും നിരാശപ്പെടുത്തിയ സഞ്ജുവിന് കാര്യമായ സംഭാവന നല്‍കാനായില്ല. ഒമ്പത് പന്തില്‍ 11 റണ്‍സാണ് സഞ്ജു നേടിയത്. എന്നാല്‍ പിന്നീട് ക്രീസിലെത്തിയ ഇഷാൻ കിഷനും ശ്രേയസ് അയ്യരും ചേർന്ന് മത്സരത്തിന്റെ ഗതി പൂർണമായി മാറ്റുകയായിരുന്നു.
ഇരുവരും ചേർന്ന് അതിവേഗം റണ്‍സ് കൂട്ടിച്ചേർത്തതോടെ ഇന്ത്യ വിജയത്തിലേക്ക് കുതിച്ചു. 56 പന്തിലാണ് ഇരുവരും ചേർന്ന് ടീം സ്കോർ 100 കടത്തിയത്. തുടർന്ന് 42 പന്തില്‍ സെഞ്ച്വറി പൂർത്തിയാക്കിയ അയ്യർ വിഡീസിനെതിരായ ട്വന്റി-20യില്‍ ഒരു ഇന്ത്യൻ താരം നേടുന്ന ഏറ്റവും വേഗമേറിയ സെഞ്ച്വറികളിലൊന്നായി മാറി. ആകെ 43 പന്തില്‍ 102 റണ്‍സുമായി താരം പുറത്താകാതെ നിന്നു.
അഞ്ച് മത്സര പരമ്പരയിലെ ആദ്യ മത്സരത്തിലെ ജയം ഇന്ത്യയ്ക്ക് ആത്മവിശ്വാസം നല്‍കുന്നതാണ്. ഏഷ്യൻ ഗെയിംസ് സ്വർണത്തിന് ശേഷം നടക്കുന്ന ആദ്യ ട്വന്റി20- മത്സരത്തില്‍ ഇന്ത്യ ചില സൂപ്പർ താരങ്ങള്‍ക്ക് വിശ്രമം നല്‍കിയിരുന്നു. യുവതാരം വൈഭവ് സൂര്യവംശിയും ആദ്യ മത്സരത്തില്‍ കളിച്ചില്ല.
