കൊച്ചി:ലൈംഗിക അതിക്രമ പരാതിയിൽ ഒളിവിൽ പോയ ഡോക്ടർ ജോൺസൺ കെ വർഗീസിനെ കണ്ടെത്താൻ ഊർജ്ജിത തിരച്ചിൽ ആരംഭിച്ച് പൊലീസ്. പ്രതിയായ ജോൺസൺ കെ വർഗീസിന് വേണ്ടി കഴിഞ്ഞദിവസം ലുക്ക് ഔട്ട് സർക്കുലർ പുറപ്പെടുവിച്ചിരുന്നു. ഇയാൾ വിദേശത്തേക്ക് കടന്നിട്ടുണ്ട് എന്നാണ് പൊലീസ് അനുമാനം. പ്രതിയുടെ മൊബൈൽ ഫോണിൽ നിന്ന് നിരവധി സ്ത്രീകളുടെ സ്വകാര്യ ദൃശ്യങ്ങൾ ലഭ്യമായ സാഹചര്യത്തിൽ കൂടുതൽ പരാതികളും ഉണ്ടാകുമെന്ന് അന്വേഷണസംഘം കണക്കുകൂട്ടുന്നു.
ഏകദേശം 12 യുവതികളുടെ സ്വകാര്യദൃശ്യങ്ങളാണ് ഡോക്ടറുടെ മൊബൈൽഫോണിൽനിന്ന് പൊലീസ് കണ്ടെത്തിയത്. യുവതികൾക്കൊപ്പമുള്ള സ്വകാര്യനിമിഷങ്ങൾ ഡോക്ടർ മൊബൈൽഫോണിൽ പകർത്തി സൂക്ഷിച്ചെന്നാണ് പൊലീസ് പറയുന്നത്. ഇതിൽ ഉൾപ്പെട്ട യുവതികളുടെ പരാതി ലഭിച്ചാൽ ഡോക്ടർക്കെതിരേ കൂടുതൽ കേസുകൾ രജിസ്റ്റർ ചെയ്യുമെന്നും പൊലീസ് പറഞ്ഞു.
