കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം (MeitY) പുറപ്പെടുവിച്ച ‘പ്രൊമോഷൻ ആൻഡ് റെഗുലേഷൻ ഓഫ് ഓൺലൈൻ ഗെയിമിംഗ് റൂൾസ്, 2026’ പ്രകാരം മെയ് 1 മുതൽ ഈ നിയമം പ്രാബല്യത്തിൽ വരും. 2025-ൽ പാർലമെന്റ് പാസാക്കിയ നിയമത്തിന്റെ തുടർച്ചയായാണ് ഈ ചട്ടങ്ങൾ ഇപ്പോൾ വിജ്ഞാപനം ചെയ്തിരിക്കുന്നത്.
സമ്പൂർണ്ണ നിരോധനം: പണം നിക്ഷേപിച്ച് പണമോ മറ്റ് സമ്മാനങ്ങളോ തിരികെ നേടാമെന്ന പ്രതീക്ഷയോടെ കളിക്കുന്ന എല്ലാ ഓൺലൈൻ ഗെയിമുകളും (Real Money Games) നിരോധിച്ചു. മുമ്പ് ‘നൈപുണ്യം’ (Skill), ‘ഭാഗ്യം’ (Chance) എന്നിങ്ങനെ വേർതിരിച്ചിരുന്നെങ്കിലും, പുതിയ നിയമത്തിൽ പണം ഉൾപ്പെടുന്ന എല്ലാ ഗെയിമുകളും ഒരേപോലെ നിരോധന പരിധിയിൽ വരും.
ബാങ്കുകൾക്കും നിയന്ത്രണം:
ഇത്തരം ഗെയിമുകൾക്കായി പണമിടപാടുകൾ നടത്താൻ ബാങ്കുകളോ ധനകാര്യ സ്ഥാപനങ്ങളോ അനുവദിക്കരുത്. നിയമവിരുദ്ധമായ ഗെയിമിംഗ് പ്ലാറ്റ്ഫോമുകളിലേക്കുള്ള പണമൊഴുക്ക് തടയാൻ ബാങ്കുകൾക്ക് കർശന നിർദ്ദേശം നൽകിയിട്ടുണ്ട്.
പരസ്യങ്ങൾക്ക് വിലക്ക്:
ഓൺലൈൻ പണമിടപാട് ഗെയിമുകളെ പ്രോത്സാഹിപ്പിക്കുന്ന തരത്തിലുള്ള യാതൊരുവിധ പരസ്യങ്ങളും (സോഷ്യൽ മീഡിയയിലോ പത്ര-ദൃശ്യ മാധ്യമങ്ങളിലോ) പാടില്ല.
കടുത്ത പിഴ ശിക്ഷ:
നിരോധിത ഗെയിമുകൾ നടത്തുന്നവർക്ക് 1 കോടി രൂപ വരെ പിഴയും 3 വർഷം വരെ തടവും ലഭിക്കാം. പരസ്യം നൽകുന്നവർക്ക് 50 ലക്ഷം രൂപ വരെയാണ് പിഴ.
