സെൻസസ് 2027- പൗരന്മാർക്ക് സെൽഫ് എന്യുമറേഷൻ 2026 ജൂണ് 16 മുതല് 30 വരെ പൊതുജനങ്ങള്ക്ക് സ്വന്തമായി വിവരങ്ങള് നല്കാനാവുന്ന സെല്ഫ് എന്യുമറേഷന് സൗകര്യമൊരുക്കുന്നുണ്ട്. പരമാവധിപ്പേർ സെൽഫ് എന്യുമറേഷൻ സാധ്യതകൾ പ്രയോജനപ്പെടുത്തണം. വീടുകളില് സെന്സസ് ചുമതലയുള്ള ഉദ്യോഗസ്ഥരെത്തി വിവരങ്ങള് ശേഖരിക്കുന്നതിന് പകരം പൊതുജനങ്ങള്ക്ക് തങ്ങളുടെ കുടുംബത്തിന്റെ വിവരങ്ങള് സ്വന്തമായി തന്നെ പ്രത്യേക പോര്ട്ടലില് നല്കാന് കഴിയുന്ന സംവിധാനമാണ് സെല്ഫ് എന്യുമറേഷന്. ആദ്യ ഘട്ട വിവരശേഖരണം ആരംഭിക്കുന്നതിന് 15 ദിവസം മുമ്പ് സെല്ഫ് എന്യുമറേഷന് സൗകര്യം ആരംഭിക്കും. ഉദ്യോഗസ്ഥര് വീട്ടിലെത്തി വിവരശേഖരണം ആരംഭിക്കുന്നതിന് മുമ്പ് സെല്ഫ് എന്യുമറേഷന് സൗകര്യം അവസാനിക്കുകയും ചെയ്യും. (ലിങ്ക് കമന്റിൽ)
കുടുംബനാഥനോ കുടുംബനാഥയ്ക്കോ അല്ലെങ്കില് അവര്ക്ക് വേണ്ടി ഏതെങ്കിലും കുടുംബാംഗത്തിനോ വിവരങ്ങള് നല്കാം. പോര്ട്ടലില് പ്രവേശിച്ച് സംസ്ഥാനം തെരഞ്ഞെടുത്ത ശേഷം കുടുംബനാഥന്റെ പേരും മൊബൈല് നമ്പറും നല്കണം. ഒരു മൊബൈല് നമ്പര് ഒരു കുടുംബത്തിന് മാത്രമേ ഉപയോഗിക്കാന് കഴിയൂ. മൊബൈല് ഫോണില് ലഭിക്കുന്ന ഒ.ടി.പി നല്കിയാല് വീട് സ്ഥിതി ചെയ്യുന്ന സ്ഥലം മാപ്പില് നിന്ന് തെരഞ്ഞെടുക്കണം. അതിന് ശേഷം വിവരശേഖരണത്തിനുള്ള സെന്സസ് ചോദ്യാവലി ദൃശ്യമാവും. കുടുംബാംഗങ്ങളുടെ പൊതുവായ വിവരങ്ങളും വീടിന്റെ അവസ്ഥയും വീട്ടില് ലഭ്യമായ സൗകര്യങ്ങളെയും കുറിച്ചുമുള്ള ലളിതമായ ചോദ്യങ്ങളാണുണ്ടാവുക. ഇവയ്ക്ക് കൃത്യമായ ഉത്തരം നല്കണം.
എല്ലാ ചോദ്യങ്ങള്ക്കും ഉത്തരം നല്കി സെല്ഫ് എന്യുമറേഷന് പൂര്ത്തിയാക്കുമ്പോള് 11 അക്ക ഐ.ഡി ലഭിക്കും. എസ്.എം.എസ് വഴിയും ഈ ഐ.ഡി ലഭ്യമാവും. സെന്സസ് ഉദ്യോഗസ്ഥര് വീട്ടിലെത്തുമ്പോള് ഈ സെല്ഫ് എന്യുമറേഷന് ഐ.ഡി അവര്ക്ക് കൈമാറണം.
1-7-26 മുതല് 30-7-26 വരെ ഉദ്യോഗസ്ഥര് വീടുകളിലെത്തി ആദ്യഘട്ട വിവരശേഖരണം നടത്തും. വീടുകളുടെ വിവരങ്ങളും താമസക്കാരുടെ പൊതുവിവരശേഖരണവുമാണ് ഒന്നാം ഘട്ടത്തിൽ നടക്കുക. താമസയോഗ്യമായ എല്ലാ കെട്ടിടങ്ങളുടെയും മറ്റ് സ്ഥാപനങ്ങളുടെയും വിവരങ്ങള് ഈ ഘട്ടത്തില് ഉദ്യോഗസ്ഥര് ശേഖരിക്കും.
തുടര്ന്ന് അടുത്ത വര്ഷം (2027) ഫെബ്രുവരി, മാര്ച്ച് മാസങ്ങളിലായിരിക്കും ജനസംഖ്യാ കണക്കെടുപ്പ്.
