ട്വന്റി-20 ക്രിക്കറ്റില്‍ സെഞ്ച്വറികളുടെ എണ്ണത്തില്‍ വിരാട് കൊഹ്‌ലിയെ മറികടന്ന് ഇന്ത്യൻ താരം അഭിഷേക് ശർമ്മ.ന്യൂസിലൻഡിനെതിരായ മൂന്നാം ട്വന്റി-20യില്‍ വെറും 38 പന്തില്‍ 113 റണ്‍സ് അടിച്ചുകൂട്ടിയാണ് അഭിഷേക് ഈ നേട്ടം സ്വന്തമാക്കിയത്. ഒൻപത് ഫോറും 11 സിക്സും ഉള്‍പ്പെട്ട ഇന്നിംഗ്സില്‍ 297.37 ആയിരുന്നു താരത്തിന്റെ സ്‌ട്രൈക്ക് റേറ്റ്. ഇതോടെ അഭിഷേകിന്റെ ആകെ ട്വന്റി-20 സെഞ്ച്വറികളുടെ എണ്ണം 11 ആയി. കൊഹ്‌ലിയുടെ പേരിലുള്ള 10 സെഞ്ച്വറികളുടെ റെക്കാഡാണ് താരം മറികടന്നത്. ട്വന്റി-20 ക്രിക്കറ്റില്‍ ഏറ്റവും കൂടുതല്‍ സെഞ്ച്വറികള്‍ നേടിയ താരങ്ങളുടെ പട്ടികയില്‍ വെസ്റ്റ് ഇൻഡീസ് ഇതിഹാസം ക്രിസ് ഗെയ്ല്‍ (22), പാകിസ്ഥാന്റെ ബാബർ അസം (13) എന്നിവർക്കു പിന്നില്‍ മൂന്നാം സ്ഥാനത്താണ് അഭിഷേക്.
ട്വന്റി-20 രാജ്യാന്തര മത്സരങ്ങളില്‍ അഭിഷേകിന്റെ സെഞ്ച്വറികളുടെ എണ്ണം നാലായി. ഈ നേട്ടത്തോടെ രോഹിത് ശർമ്മ, സൂര്യകുമാർ യാദവ്, ഇംഗ്ലണ്ടിന്റെ ഫില്‍ സാള്‍ട്ട് എന്നിവർക്കൊപ്പമെത്തി. ട്വന്റി-20 രാജ്യാന്തരത്തില്‍ ഏറ്റവും കൂടുതല്‍ സെഞ്ച്വറികള്‍ നേടിയ റെക്കാഡ് ഓസ്‌ട്രേലിയൻ ഓള്‍റൗണ്ടർ ഗ്ലെൻ മാക്സ്‌വെല്ലിന്റെ പേരിലാണ്. അഞ്ച് സെഞ്ച്വറികളാണ് മാക്സ്‌വെല്ലിനുള്ളത്.
70 ട്വന്റി-20 രാജ്യാന്തര മത്സരങ്ങളില്‍നിന്ന് 69 ഇന്നിംഗ്സുകളിലായി 2,240 റണ്‍സാണ് അഭിഷേക് നേടിയിട്ടുള്ളത്. 33.43 ആണ് ബാറ്റിംഗ് ശരാശരി. സ്‌ട്രൈക്ക് റേറ്റ് 196.83. നാലു സെഞ്ച്വറികള്‍ക്കൊപ്പം 14 അർദ്ധസെഞ്ച്വറികളും താരത്തിന്റെ പേരിലുണ്ട്. 135 റണ്‍സാണ് ഉയർന്ന സ്‌കോർ.
ഈ വർഷം മാത്രം 37 ട്വന്റി-20 രാജ്യാന്തര മത്സരങ്ങളില്‍നിന്ന് അഭിഷേക് 1,125 റണ്‍സ് നേടിയിട്ടുണ്ട്. രണ്ടു സെഞ്ച്വറികളും എട്ട് അർദ്ധസെഞ്ച്വറികളും ഇതില്‍ ഉള്‍പ്പെടുന്നു. ഒരു കലണ്ടർ വർഷത്തില്‍ ഏറ്റവും കൂടുതല്‍ ട്വന്റി-20 രാജ്യാന്തര റണ്‍സ് നേടിയ ഇന്ത്യൻ താരമെന്ന സൂര്യകുമാർ യാദവിന്റെ റെക്കാഡ് മറികടക്കാൻ അഭിഷേകിന് ഇനി 40 റണ്‍സ് കൂടി മതി. 2022ല്‍ സൂര്യകുമാർ നേടിയ 1,164 റണ്‍സാണ് നിലവിലെ റെക്കാഡ്.
ട്വന്റി-20യില്‍ പത്ത് സിക്‌സോ അതിലധികമോ നേടുന്നത് അഭിഷേകിന്റെ കരിയറില്‍ ഇത് ഏഴാം തവണയാണ്. 18 തവണ ഈ നേട്ടം കൈവരിച്ച ക്രിസ് ഗെയ്ല്‍ മാത്രമാണ് ഇക്കാര്യത്തില്‍ അഭിഷേകിന് മുന്നിലുള്ളത്. ഈ നേട്ടം അഭിഷേക് മൂന്ന് തവണ സ്വന്തമാക്കിയപ്പോള്‍ ഗെയ്‌ലിന് രണ്ട് തവണ മാത്രമാണുള്ളത്. ഓസ്ട്രിയയുടെ കരണ്‍ബീർ സിംഗ് അഞ്ച് തവണ ഈ നേട്ടം കൈവരിച്ചിട്ടുണ്ട്. ട്വന്റി-20യില്‍ 150 സിക്സുകള്‍ പിന്നിടുന്ന മൂന്നാമത്തെ ഇന്ത്യൻ താരവുമായി അഭിഷേക്. താരത്തിന്റെ ആകെ സിക്സുകളുടെ എണ്ണം 158 ആയി. സൂര്യകുമാർ യാദവ് (179), രോഹിത് ശർമ്മ (205) എന്നിവരാണ് അഭിഷേകിന് മുന്നിലുള്ളത്.
