പത്തനംതിട്ട: സ്കൂ‌ൾ വിദ്യാർഥികൾ സഞ്ചരിച്ച ഓട്ടോ തോട്ടിലേക്ക് മറിഞ്ഞുണ്ടായ അപകടത്തിൽ ഒരു കുട്ടിയെ കാണാനില്ല. ഓട്ടോയിലുണ്ടായിരുന്ന യദുകൃഷ്ണൻ(4) എന്ന വിദ്യാർഥിയെയാണ് കാണാതായത്. ഇതോടെ കുട്ടിയെ കണ്ടെത്താനായി തോട്ടിലും സമീപത്തും രാത്രിയും തിരച്ചിൽ തുടരുകയാണ്.
ബുധനാഴ്ച വൈകീട്ടാണ് പത്തനംതിട്ട തൂമ്പാക്കുളത്ത് ഓട്ടോ തോട്ടിലേക്ക് മറിഞ്ഞത്. അപകടത്തിൽ കരുമാൻതോട് ശ്രീനാരായണ സ്കൂളിലെ മൂന്നാംക്ലാസ് വിദ്യാർഥിനി തൂമ്പാക്കുളം സ്വദേശിനിയായ ആദിലക്ഷ്മി(7) മരിച്ചിരുന്നു. ഓട്ടോയിൽ ആകെ അഞ്ചു കുട്ടികളുണ്ടായിരുന്നതായാണ് ആദ്യം കരുതിയിരുന്നത്. പരിക്കേറ്റ മറ്റുകുട്ടികളെയും ഡ്രൈവറെയും പിന്നീട് ആശുപത്രിയിൽ പ്രവേശിപ്പിച്ചിരുന്നു. ഇതിനുപിന്നാലെയാണ് മറ്റൊരു വിദ്യാർഥിയായ യദുകൃഷ്ണനെ കാണാനില്ലെന്ന സംശയമുയർന്നത്. ഓട്ടോയിൽ ആകെ ആറുകുട്ടികളുണ്ടായിരുന്നതായും പറയുന്നു.
വൈകീട്ട് നാലുമണിക്ക് സ്‌കൂൾവിട്ടശേഷം കുട്ടികളുമായി പോയ ഓട്ടോയാണ് അപകടത്തിൽപ്പെട്ടത്. റോഡിൽ പാമ്പിനെ കണ്ടപ്പോൾ അതിന് മുകളിലൂടെ കയറാതിരിക്കാനായി ഓട്ടോ വെട്ടിച്ചെന്നും ഇതോടെയാണ് നിയന്ത്രണംവിട്ട് തോട്ടിലേക്ക് മറിഞ്ഞതെന്നുമാണ് വിവരം.
