ആന്ധ്രാപ്രദേശിലെ പൽനാട് ജില്ലയിൽ നെഞ്ചുവേദനയും വയറുവേദനയുമായി ആശുപത്രിയിലെത്തിയ 33 കാരിയായ യുവതിയുടെ വയറ്റിൽ നിന്ന് 14 പേനകളും അഞ്ച് തടി സ്പൂണുകളും ഒരു മെഴുകുതിരിയും ശസ്ത്രക്രിയയിലൂടെ പുറത്തെടുത്തു.
നരസറാവുപേട്ടയിലെ മാതാശ്രീ സ്വകാര്യ ആശുപത്രിയിൽ പ്രവേശിപ്പിച്ച യുവതിയെ സ്കാനിംഗിന് വിധേയയാക്കിയപ്പോഴാണ് ദഹനവ്യവസ്ഥയിൽ ഈ വസ്തുക്കൾ കുടുങ്ങിക്കിടക്കുന്നത് കണ്ട് ഡോക്ടർമാർ ഞെട്ടിയത്. ഡോ. പി രാമചന്ദ്ര റെഡ്ഡിയുടെ നേതൃത്വത്തിലുള്ള വിദഗ്ധ സംഘം ലാപ്രോസ്കോപ്പിക് ശസ്ത്രക്രിയയിലൂടെ വയറ്റിൽ ദ്വാരമുണ്ടാക്കി ഈ 20 വസ്തുക്കളും സുരക്ഷിതമായി പുറത്തെടുക്കുകയായിരുന്നു.
പുറത്തെടുത്ത പേനകളിലൊന്നിന്റെ മൂടി നഷ്ടപ്പെട്ട നിലയിലായിരുന്നുവെന്നും അത് വയറ്റിൽ കുത്തിക്കയറിയതാണ് യുവതിക്ക് കടുത്ത വേദനയുണ്ടാക്കാൻ കാരണമായതെന്നും ഡോക്ടർമാർ വ്യക്തമാക്കി. കഴിഞ്ഞ പത്ത് വർഷമായി യുവതി കടുത്ത മാനസിക അസ്വസ്ഥതകൾ നേരിടുന്നുണ്ടെന്ന് ബന്ധുക്കൾ അറിയിച്ചു. ഭക്ഷണയോഗ്യമല്ലാത്ത വസ്തുക്കൾ കഴിക്കുന്ന പികാ സിൻഡ്രോം എന്ന അപൂർവ്വ മാനസികാവസ്ഥയോ അതിതീവ്രമായ മനോവിഷമമോ ആകാം ഇത്രയധികം വസ്തുക്കൾ വിഴുങ്ങാൻ യുവതിയെ പ്രേരിപ്പിച്ചത് എന്നാണ് വൈദ്യസംഘം സംശയിക്കുന്നത്.
രണ്ടുമാസത്തിലേറെയായി യുവതി കടുത്ത മാനസിക സമ്മർദ്ദത്തിലായിരുന്നുവെന്ന് പിതാവ് ഹനുമന്തറാവു വ്യക്തമാക്കി. ശസ്ത്രക്രിയക്ക് ശേഷം നിലവിൽ യുവതിയുടെ ആരോഗ്യനില തൃപ്തികരമായി തുടരുകയാണെന്നും അവർ സുഖം പ്രാപിച്ചുവരികയാണെന്നും ആശുപത്രി അധികൃതർ സ്ഥിരീകരിച്ചു. അപൂർവ്വമായ ഈ സംഭവം പ്രദേശത്ത് വലിയ ചർച്ചയാവുകയും മാനസികാരോഗ്യ പരിചരണത്തിന്റെ പ്രാധാന്യത്തിലേക്ക് വിരൽ ചൂണ്ടുകയും ചെയ്തിട്ടുണ്ട്.
