കൊച്ചി: എറണാകുളം നഗരത്തിലെ ആഡംബര സ്പാകളുടെ തിളക്കമുള്ള ബോർഡുകൾക്കു പിന്നിൽ മറഞ്ഞിരുന്ന കൊടുംചതിയുടെയും പെൺവാണിഭ ശൃംഖലയുടെയും ഞെട്ടിക്കുന്ന വിവരങ്ങളാണ് ഒന്നൊന്നായി പുറത്തുവരുന്നത്. കേസിൽ അറസ്റ്റിലായ വയനാട് സ്വദേശിനി അമ്മു എന്ന ശരണ്യ കേവലമൊരു സഹായിയോ ചെറിയ മീനോ അല്ലെന്നും ഇരകളെ വലയിലാക്കുന്നതിലും ക്രൂരമായി വേട്ടയാടുന്നതിലും മുന്നിൽ നിന്ന പ്രധാന കണ്ണിയാണെന്നും വ്യക്തമായിക്കഴിഞ്ഞു. നഗരകേന്ദ്രങ്ങളിൽ തഴച്ചുവളരുന്ന ഈ അനാചാര മാഫിയയ്ക്കു പിന്നിൽ വമ്പൻ സ്രാവുകളുണ്ടെന്ന സംശയത്തിലാണ് പൊലീസ് അന്വേഷണം മുന്നേറുന്നത്.
ആലപ്പുഴ കാർത്തികപ്പള്ളി സ്വദേശിയായ ഒന്നാം പ്രതി ശ്രീരാജ്, കൊച്ചി നഗരത്തിന്റെ വിവിധ ഭാഗങ്ങളിലായി നാലോളം വ്യാജ ആയുർവേദ സ്പാകളാണ് നടത്തിവന്നിരുന്നത്. ആയുർവേദ ചികിത്സയുടെയും മസാജിന്റെയും മറവിൽ പെൺവാണിഭവും ലഹരിവ്യാപാരവും തകൃതിയായി നടത്തുകയായിരുന്നു ഇവരുടെ രീതി. തടസ്സങ്ങളില്ലാതെ ഇത്തരം കേന്ദ്രങ്ങൾ മുന്നോട്ടുകൊണ്ടുപോകാൻ ഉന്നത തലങ്ങളിൽനിന്നു ലഭിച്ച സാമ്പത്തിക, രാഷ്ട്രീയ പിന്തുണയെക്കുറിച്ചും അന്വേഷണസംഘം സൂചനകൾ ശേഖരിക്കുന്നുണ്ട്.
ജീവിതത്തിലെ കടുത്ത സാമ്പത്തിക പ്രയാസങ്ങളെ മറികടക്കാൻ സ്വന്തമായി വരുമാനമുണ്ടാക്കണമെന്ന ആഗ്രഹത്തോടെയാണ് എറണാകുളം കാലടിയിൽ വാടകയ്ക്കു താമസിച്ചിരുന്ന മുൻ അധ്യാപിക ഈ ചതിക്കുഴിയിൽ വീഴുന്നത്. ടാക്സി ഡ്രൈവറായ ഭർത്താവിന്റെ വരുമാനം മാത്രം കൊണ്ട് കുടുംബം മുന്നോട്ടുകൊണ്ടുപോകാൻ പ്രയാസപ്പെട്ടപ്പോഴാണ് ഇവർ ജോലിക്കായി ശ്രമങ്ങൾ ആരംഭിച്ചത്.
അടുത്തിടെയുണ്ടായ ഗർഭഛിദ്രത്തെ തുടർന്നുണ്ടായ കടുത്ത ശാരീരിക-മാനസിക പ്രയാസങ്ങളിൽനിന്ന് ഇനിയും പൂർണ്ണമായി മോചിതയാകാത്ത അവസ്ഥയിലായിരുന്നു യുവതി. സാമ്പത്തിക ബാധ്യതകളും ആരോഗ്യപ്രശ്നങ്ങളും ഒരുപോലെ അലട്ടിയ അന്തരീക്ഷത്തിൽനിന്നാണ് പുതിയൊരു ജീവിതമാർഗ്ഗം തേടി ഇവർ മുന്നോട്ടിറങ്ങിയത്.
കാലടിയിലെ താമസസ്ഥലത്തിരിക്കെയാണ് കൊച്ചിയിലെ ഒരു സ്ഥാപനത്തിൽ സ്പാ മാനേജർ തസ്തികയിലേക്ക് ഒഴിവുണ്ടെന്ന പരസ്യം യുവതിയുടെ ശ്രദ്ധയിൽപ്പെടുന്നത്. കുടുംബത്തിന് ചെറിയൊരു താങ്ങാവുമെന്ന പ്രതീക്ഷയിൽ ഇവർ മടിക്കാതെ അപേക്ഷ സമർപ്പിക്കുകയായിരുന്നു.
ഭർത്താവ് ടാക്സി ട്രിപ്പുമായി ബന്ധപ്പെട്ട് മൂന്നാറിലേക്ക് പോയ ദിവസമാണ് യുവതിക്ക് അഭിമുഖത്തിനായി വിളിവരുന്നത്. സ്ഥാപനത്തിലെ മാനേജരാണെന്ന് സ്വയം പരിചയപ്പെടുത്തിയ ഒരു സ്ത്രീ ഇവരുമായി സംസാരിക്കുകയും ജോലി ഉറപ്പായതായി വിശ്വസിപ്പിക്കുകയും ചെയ്തു. ഇവർ വിരിച്ച തന്ത്രപരമായ വലയിൽ നിസ്സഹായയായ യുവതി വീഴുകയായിരുന്നു.
സന്തോഷവാർത്ത ഉടനടി ഭർത്താവിനെ ഫോണിൽ വിളിച്ചറിയിച്ച് ആശ്വാസം കൊള്ളുമ്പോഴാണ് പ്രതികൾ തങ്ങളുടെ അടുത്ത കെണിയൊരുക്കിയത്. അന്ന് രാത്രി 11 മണിക്ക് തന്നെ അടിയന്തരമായി ജോലിയിൽ പ്രവേശിക്കണമെന്ന് ഇവർ ആവശ്യപ്പെടുകയും, യുവതിയെ കൂട്ടിക്കൊണ്ടുവരാൻ പ്രത്യേക വാഹനം അയച്ചുനൽകുകയും ചെയ്തു.
എന്നാൽ, ജോലിസ്ഥലത്ത് എത്തിയ യുവതിയെ കാത്തിരുന്നത് നരകതുല്യമായ അനുഭവങ്ങളായിരുന്നു. സ്വീകരണ മുറിയിലെത്തിച്ച യുവതിക്ക് പ്രതികൾ ബിയറും ഐസ്ക്രീമും നൽകി. ഐസ്ക്രീമിൽ മാരകമായ ലഹരിമരുന്ന് കലർത്തി ബോധരഹിതയാക്കിയ ശേഷമായിരുന്നു മൃഗീയമായ പീഡനം ആരംഭിച്ചത്.
പൂർണ്ണമായും ബോധം നഷ്ടപ്പെട്ട അവസ്ഥയിലായ യുവതിയെ മുറിക്കുള്ളിലിട്ട് കൂട്ടബലാത്സംഗത്തിന് ഇരയാക്കുകയായിരുന്നു. പിറ്റേന്ന് രാവിലെ ബോധം വീണ്ടുകിട്ടുമ്പോഴാണ് താൻ ക്രൂരമായ ലൈംഗിക വേട്ടയാടലിന് ഇരയായ വിവരം യുവതി നടുക്കത്തോടെ തിരിച്ചറിയുന്നത്.
പ്രാണരക്ഷാർത്ഥം പുറത്തേക്ക് ഓടി രക്ഷപ്പെടാൻ ശ്രമിച്ചെങ്കിലും പ്രതികൾ മുറി പുറത്തുനിന്ന് പൂട്ടി. തുടര്‍ന്ന് ഇവർ വീണ്ടും കൂട്ടമായി ചേർന്ന് യുവതിയെ ദേഹോപദ്രവം ഏൽപ്പിക്കുകയും പീഡനദൃശ്യങ്ങൾ മൊബൈൽ ഫോണിൽ പകർത്തി ഭീഷണിപ്പെടുത്തുകയും ചെയ്തു. സംഭവം പുറത്തുപറഞ്ഞാൽ ജീവനോടെ വെച്ചേക്കില്ലെന്നായിരുന്നു ഭീഷണി.
വൈകുന്നേരത്തോടെ പുറത്തുനിന്ന് കൂടുതൽ ആളുകൾ മുറിയിലേക്ക് എത്തിയതോടെ യുവതിക്ക് തന്റെ അപകടാവസ്ഥ ബോധ്യപ്പെട്ടു. ജീവൻ പോയാലും സാരമില്ലെന്ന തീരുമാനത്തിൽ, മുറിയിലുണ്ടായിരുന്ന ബിയർ കുപ്പി തല്ലിപ്പൊട്ടിച്ച് സ്വയം കുത്തി ജീവനൊടുക്കുമെന്ന് ഇവർ അലറിവിളിച്ചു. യുവതിയുടെ രൗദ്രഭാവത്തിൽ ഭയന്നുപോയ സംഘം ഒടുവിൽ ഇവരെ വിട്ടയക്കാൻ നിർബന്ധിതരാവുകയായിരുന്നു.
പിറ്റേന്ന് വൈകിട്ട് മൂന്നാറിലെ ട്രിപ്പ് കഴിഞ്ഞ് ഭർത്താവ് വീടെത്തുമ്പോൾ വീടിനുള്ളിൽ വെളിച്ചം പോലും തെളിക്കാതെ തലയിണയിൽ മുഖം അമർത്തി നിലവിളിക്കുന്ന നിലയിലായിരുന്നു യുവതി. കൊച്ചിയിലെ കടുത്ത ചൂടേറ്റതുകൊണ്ടാണ് മുഖത്ത് നീരു വന്നതെന്ന് ആദ്യം പറഞ്ഞെങ്കിലും കാര്യങ്ങൾ അതായിരുന്നില്ല.
പരിശോധിച്ചപ്പോൾ തേനീച്ചക്കുത്തേറ്റതുപോലെ മുഖത്തിന്റെ ഇരുവശങ്ങളും നീരുവന്ന് വീർത്തുപൊട്ടിയ പാടുകളായിരുന്നു. ഭർത്താവ് സ്നേഹത്തോടെയും ആശ്വാസത്തോടെയും നിരന്തരം ചോദിച്ചപ്പോഴാണ് താൻ അനുഭവിച്ച ക്രൂരതകൾ ഇവർ കരഞ്ഞുകൊണ്ട് വെളിപ്പെടുത്തിയത്. സംഘത്തിലുണ്ടായിരുന്ന വയനാടുകാരി അമ്മുവാണ് തന്നെ ഏറ്റവും മൃഗീയമായി ഉപദ്രവിച്ചതെന്നും യുവതി പറഞ്ഞു.
നിലവിൽ ആരെയും തിരിച്ചറിയാനാകാത്ത വിധം അതീവ ഗുരുതരമായ മാനസികാഘാതത്തിലാണ് ഈ മുൻ അധ്യാപിക. അടുത്തുചെല്ലുന്നവരോട് ദേഷ്യപ്പെടുകയും സ്വന്തം വസ്ത്രങ്ങൾ വലിച്ചു കീറി ഭയന്നോടുകയും ചെയ്യുന്ന അതീവ ദയനീയ അവസ്ഥയിലാണ് ഇവർ. നിർദ്ധന കുടുംബമായതിനാൽ ആശുപത്രിയിലെ ഭാരിച്ച ചികിത്സാച്ചെലവുകൾ കണ്ടെത്താനാകാതെ ഇവരുടെ കുടുംബം നെട്ടോട്ടമോടുകയാണ്.
കേസിൽ ഒന്നാം പ്രതി ശ്രീരാജ്, രണ്ടാം പ്രതി അമ്മു (ശരണ്യ), മൂന്നാം പ്രതി സഞ്ജു, നാലാം പ്രതി ജിത്ത് മാർട്ടിൻ എന്നിവരെ പൊലീസ് വലയിലാക്കിയിട്ടുണ്ട്. ശ്രീരാജിന്റെ നിയന്ത്രണത്തിലുണ്ടായിരുന്ന ഇടപ്പള്ളി കൂനംതൈ ഉണിച്ചിറയിലെ ‘ഡിലൈറ്റ് ആയുർവേദിക് സ്പാ’ പൊലീസ് റെയ്ഡ് ചെയ്തു പൂട്ടി. തൊഴിൽ തേടിയെത്തുന്ന നിസ്സഹായരായ സ്ത്രീകളെ മയക്കുമരുന്ന് കെണിയിലാക്കി വൻ സെക്സ് റാക്കറ്റിന്റെ ഭാഗമാക്കുന്ന കൊടുംമാഫിയയാണ് ഇതിനു പിന്നിലെന്ന് പൊലീസ് സ്ഥിരീകരിച്ചിട്ടുണ്ട്.
