അക്വാൻ’ ചുഴലിക്കാറ്റ് ; നാല് സംസ്ഥാനങ്ങളിൽ അതിശക്തമായ മഴ മുന്നറിയിപ്പ്

ബംഗാൾ ഉൾക്കടലിൽ രൂപപ്പെട്ട ന്യൂനമർദം ശക്തമായ ചുഴലിക്കാറ്റായി മാറാൻ സാധ്യതയുള്ളതിനാൽ രാജ്യത്തിന്റെ കിഴക്കൻ തീരങ്ങളിൽ ജാഗ്രതാ നിർദേശം നൽകി ഇന്ത്യൻ കാലാവസ്ഥാ വകുപ്പ് (IMD). ‘അക്വാൻ’ (Akvan) എന്ന് പേരിട്ടേക്കാവുന്ന പുതിയ ചുഴലിക്കാറ്റ് നവംബർ 16ന് ചുഴലിക്കാറ്റായും നവംബർ 17ന് അതിശക്തമായ ചുഴലിക്കാറ്റായും മാറുമെന്നാണ് പ്രവചനം. തെക്കുകിഴക്കൻ ബംഗാൾ ഉൾക്കടലിൽ രൂപപ്പെട്ട ന്യൂനമർദം പിന്നീട് തീവ്ര ന്യൂനമർദമായി മാറുകയായിരുന്നു. ഇത് വടക്കുപടിഞ്ഞാറൻ ദിശയിൽ നീങ്ങി ആന്ധ്രാപ്രദേശ് തീരത്തേക്ക് അടുക്കാനാണ് സാധ്യത. കഴിഞ്ഞ മൂന്ന് ആഴ്ചയ്ക്കിടെ ബംഗാൾ ഉൾക്കടലിൽ രൂപപ്പെടുന്ന മൂന്നാമത്തെ ചുഴലിക്കാറ്റാണിത്. നേരത്തെ അർണബ്, മുരാസു എന്നീ ചുഴലിക്കാറ്റുകൾ കിഴക്കൻ തീരങ്ങളെ ബാധിച്ചിരുന്നു.

 

ആന്ധ്രാപ്രദേശ്, ഒഡിഷ, തമിഴ്നാട്, പശ്ചിമ ബംഗാൾ തുടങ്ങിയ സംസ്ഥാനങ്ങളിലാണ് പ്രധാനമായും ജാഗ്രത ശക്തമാക്കിയിരിക്കുന്നത്. നവംബർ 18, 19 തീയതികളിൽ തമിഴ്നാട്ടിലെ ചില പ്രദേശങ്ങളിൽ ശക്തമായ മഴയ്ക്കും നവംബർ 19 മുതൽ 21 വരെ ഒഡിഷയിൽ കനത്ത മഴയ്ക്കും സാധ്യതയുണ്ട്. തീരദേശ ആന്ധ്രാപ്രദേശിൽ നവംബർ 19, 20 തീയതികളിൽ അതിശക്തമായ മഴയ്ക്കും ഒറ്റപ്പെട്ട പ്രദേശങ്ങളിൽ അതിതീവ്ര മഴയ്ക്കും മുന്നറിയിപ്പുണ്ട്. പശ്ചിമ ബംഗാളിലെ തീരദേശ ജില്ലകളിലും ശക്തമായ മഴ ലഭിക്കുമെന്നാണ് പ്രവചനം. തെലങ്കാന, ഛത്തീസ്ഗഢ്, ജാർഖണ്ഡ് എന്നിവിടങ്ങളിലും ചില ദിവസങ്ങളിൽ മഴയ്ക്ക് സാധ്യതയുണ്ട്. ശക്തമായ കാറ്റും കടൽക്ഷോഭവും തീരദേശ മേഖലകളിൽ അപകടസാധ്യത വർധിപ്പിക്കുമെന്നും കാലാവസ്ഥാ വകുപ്പ് മുന്നറിയിപ്പ് നൽകി.

 

ചുഴലിക്കാറ്റിന്റെ പശ്ചാത്തലത്തിൽ ആന്ധ്രാപ്രദേശിലും ഒഡിഷയിലും ദുരന്തനിവാരണ പ്രവർത്തനങ്ങൾ ശക്തമാക്കിയിട്ടുണ്ട്. ഒഡിഷയിലെ എല്ലാ ജില്ലകൾക്കും ജാഗ്രതാ നിർദേശം നൽകിയതായി സംസ്ഥാന ദുരന്തനിവാരണ മന്ത്രി അറിയിച്ചു. മത്സ്യത്തൊഴിലാളികൾ ഉടൻ തീരത്തേക്ക് മടങ്ങണമെന്നും നവംബർ 20 വരെ ബംഗാൾ ഉൾക്കടലിലും ആൻഡമാൻ കടലിലും മത്സ്യബന്ധനത്തിനും മറ്റ് സമുദ്രപ്രവർത്തനങ്ങൾക്കും പോകരുതെന്നും നിർദേശിച്ചിട്ടുണ്ട്. ശക്തമായ മഴയെ തുടർന്ന് താഴ്ന്ന പ്രദേശങ്ങളിൽ വെള്ളക്കെട്ടും വെള്ളപ്പൊക്കവും കൃഷിനാശവും റോഡ് ഗതാഗത തടസ്സങ്ങളും ഉണ്ടാകാൻ സാധ്യതയുണ്ട്. ചുഴലിക്കാറ്റിന്റെ സഞ്ചാരപാതയും തീവ്രതയും സംബന്ധിച്ച് കാലാവസ്ഥാ വകുപ്പ് നിരീക്ഷണം തുടരുകയാണ്. തീരദേശവാസികൾ ഔദ്യോഗിക മുന്നറിയിപ്പുകൾ ശ്രദ്ധിക്കണമെന്നും അധികൃതർ അറിയിച്ചു.


Join our Whatsapp group for more Live News..
Click to join our Whatsapp group

Leave a Reply

Your email address will not be published. Required fields are marked *

error: Content is protected !!