ടി20 ലോകകപ്പിലെ ഇന്ത്യൻ ക്രിക്കറ്റ് ടീമിന്റെ ഉജ്ജ്വല വിജയത്തിന് പിന്നാലെ ടീമിനെ അഭിനന്ദിച്ച് പ്രധാനമന്ത്രി നരേന്ദ്ര മോദി .ലോകകപ്പ് നേട്ടം അസാധാരണമായ കഴിവുകളുടെയും ദൃഢനിശ്ചയത്തിന്റെയും ടീം വർക്കിന്റെയും മികച്ച പ്രകടനമാണെന്ന് അദ്ദേഹം വിശേഷിപ്പിച്ചു. സോഷ്യല് മീഡിയ പ്ലാറ്റ്ഫോമായ എക്സിലൂടെ പങ്കുവെച്ച കുറിപ്പില്, ടൂർണമെന്റിലുടനീളം ഇന്ത്യൻ താരങ്ങള് പ്രകടിപ്പിച്ച നിശ്ചയദാർഢ്യം എടുത്തുപറഞ്ഞ പ്രധാനമന്ത്രി, ഈ ചരിത്ര വിജയം ഓരോ ഇന്ത്യൻ പൗരന്റെയും ഹൃദയത്തെ അഭിമാനവും സന്തോഷവും കൊണ്ട് നിറച്ചുവെന്നും കൂട്ടിച്ചേർത്തു.
ടീം ഇന്ത്യയെ “ചാമ്പ്യന്മാരേ” എന്ന് അഭിസംബോധന ചെയ്തുകൊണ്ടാണ് പ്രധാനമന്ത്രി തന്റെ അഭിനന്ദന സന്ദേശം ആരംഭിച്ചത്. ശ്രദ്ധേയമായ ഈ വിജയം ഇന്ത്യൻ ടീമിന്റെ പോരാട്ടവീര്യത്തെയാണ് പ്രതിഫലിപ്പിക്കുന്നതെന്നും ടൂർണമെന്റിലുടനീളം അവർ പുലർത്തിയ മികവ് അഭിനന്ദനാർഹമാണെന്നും അദ്ദേഹം കുറിച്ചു. “നന്നായി ചെയ്തു ടീം ഇന്ത്യ” എന്ന് പറഞ്ഞുകൊണ്ട് അദ്ദേഹം ഇന്ത്യൻ ക്രിക്കറ്റ് താരങ്ങളെയും അവരുടെ കഠിനാധ്വാനത്തെയും പ്രശംസിച്ചു. രാജ്യം മുഴുവൻ ആഘോഷിക്കുന്ന ഈ നിമിഷത്തില് ഇന്ത്യൻ ടീമിന്റെ ഈ വിജയം കായിക മേഖലയ്ക്ക് വലിയ ഊർജ്ജമാണ് നല്കുന്നത്.
