സംസ്ഥാനത്ത് മോട്ടോർ വാഹന വകുപ്പ് ഏർപ്പെടുത്തിയ ചലാൻ തീർപ്പാക്കല് പദ്ധതി (Adalat) ഏപ്രില് 30ന് അവസാനിക്കുന്നു. 2024 ഡിസംബർ 31 വരെ ലഭിച്ച ചലാനുകള്ക്ക് 50 ശതമാനം തുക മാത്രം അടച്ച് കേസുകള് അവസാനിപ്പിക്കാനുള്ള ഈ അവസരം പ്രയോജനപ്പെടുത്താൻ നിരവധിയാളുകളാണ് അവസാന നിമിഷം ശ്രമിക്കുന്നത്.
മൊബൈലില് മെസ്സേജ് വന്നില്ലേ? എങ്കില് ഇങ്ങനെ പരിശോധിക്കാം
മൊബൈല് നമ്പർ മാറിയതോ അപ്ഡേറ്റ് ചെയ്യാത്തതോ കാരണം പലർക്കും തങ്ങളുടെ വാഹനത്തിന് ചലാൻ ഉണ്ടോ എന്ന കാര്യം അറിയില്ല. ഇത്തരം ബുദ്ധിമുട്ടുകള് ഒഴിവാക്കാൻ ഇപ്പോള് ഓണ്ലൈനായി പരിശോധിക്കാൻ സൗകര്യമുണ്ട്. ഇതിനായി പ്രത്യേക ക്യുആർ കോഡ് (QR Code) സംവിധാനമോ അല്ലെങ്കില് ഔദ്യോഗിക പോർട്ടലോ ഉപയോഗിക്കാം. ക്യുആർ കോഡ് സ്കാൻ ചെയ്ത് വാഹന നമ്പർ നല്കിയാല് ഇതുവരെ തീർപ്പാക്കാത്ത ചലാനുകളുടെ ലിസ്റ്റ് ലഭിക്കും.
50% ഇളവ് എങ്ങനെ ലഭിക്കും?
◾2024 ഡിസംബർ 31 വരെ റെക്കോർഡ് ചെയ്യപ്പെട്ട പെൻഡിംഗ് ചലാനുകള്ക്കാണ് ഈ ആനുകൂല്യം ലഭിക്കുക.
◾മോട്ടോർ വാഹന വകുപ്പിന്റെ https://services.mvd.kerala.gov.in എന്ന പോർട്ടല് സന്ദർശിക്കുക.
◾വാഹന നമ്പറോ ചലാൻ നമ്പറോ നല്കി ഓണ്ലൈനായി പണമടയ്ക്കാം.
കോടതിയിലേക്ക് കൈമാറിയ ചലാനുകള് ആണെങ്കില് അതത് ഓഫീസുകളുമായി നേരിട്ട് ബന്ധപ്പെട്ട് മാത്രമേ തീർപ്പാക്കാൻ സാധിക്കൂ. ഏപ്രില് 30-ന് ശേഷം പിഴയടയ്ക്കുന്നവർക്ക് മുഴുവൻ തുകയും നല്കേണ്ടി വരും. അതിനാല് ഉടൻ തന്നെ പോർട്ടല് സന്ദർശിച്ച് ചലാനുകള് ഉണ്ടോ എന്ന് പരിശോധിക്കണമെന്ന് അധികൃതർ അറിയിച്ചു.
